Kohët e fundit është kthyer në trend që këngëtarët të sjellin bashkëpunime të ndryshme. Pothuajse i gjithë sezoni i verës dhe ai i dimrit janë mbushur me bashkëpunime, e konsideruar një formulë e suksesshme për këngëtarët pasi këto këngë janë vlerësuar pozitivisht nga publiku dhe numërojnë me miliona klikime në Youtube. Duke marrë shkas nga kjo, menduam të risillnim në kujtesën tuaj bashkëpunimet që i ka bërë bashkë forca e femrës. Aktualisht shohim shumë bashkëpunime meshkuj- femra, por nuk duhet të harrojmë se sukses ka padyshim edhe në rastet kur bashkëpunimi ndodh brenda të njëjtës gjini, konkretisht femrave.
“Uh Baby”, bashkëpunimi mes Xhensila Myrtezaj dhe Kidës, është një ndër këngët më të dëgjuara të momentit. Dy këngëtaret bukuroshe kanë edhe bashkëpunime të tjera në karrierat respektive, por ky projekt mund të quhet një sukses i padiskutueshëm.
Çiljeta dhe Ingrid Gjoni u frymëzuan për të bërë bashkëpunimin e parë nga një show i quajtur “Kjo ishte loja” para shumë vitesh. “Puçi puçi” është bashkëpunimi i parë mes dy mikeshave, i cili u pëlqye shumë nga publiku. Nuk vonoi shumë dhe dy këngëtarët iu rikthyen njëra-tjetrës dhe publikuan vazhdimin e projektit të parë me titull “Mike dhe rivale”.
Eliza Hoxha dhe Rosela Gjylbegu sollën në vitin 2009 në “Kënga Magjike” një këngë e cila u vlerësua si një nga më të bukurat e edicionit. “Rruga e zemrës” u thotë të gjithëve që të besojnë në fuqinë e zemrës, duke përcjellë kështu një mesazh domethënës.
Dy këngëtare stili, Jonida Maliqi dhe Tuna Sejdi, u bënë bashkë për të sjellë në festivalin e muzikës moderne “Top fest”, “Forcën e femrës”. E gjithë kënga i dedikohet figurës femërore dhe ndjenjave të saj, të cilat shpesh ndrydhen nga realiteti. Bashkëpunimi i tyre mund të quhet një nga më të bukurit me këtë tematikë.
Të gjithë e njohim Alketa Vejsiun si moderatore, por ajo nuk e ka fshehur asnjëherë pasionin e saj për muzikën. Për shumë shqiptarë ishte hera e parë që shihnin Miriam Canin, një këngëtare e cila e kishte zhvilluar karrierën e saj muzikore në Gjermani. “Don’t Surrender” ishte bashkëpunimi i cili bëri bashkë dy mikesha të vjetra.
Dy këngëtaret kosovare, Argjentina Ramosaj dhe Gjira, e cila njihet për stilin e saj të veçantë të të kënduarit, erdhën në një bashkëpunim i cili u prit shumë mirë nga publiku. “Déjà vu” nga vetë titulli i dedikohet një historie dashurie, e cila ka marrë fund shumë vite më parë, por që një ditë rishfaqet dhe të rikthen ndjenjat.
Greta Koçi ishte e njohur për publikun dhe mund të themi se ishte në pikun e karrierës kur Eni publikoi këngën e saj të parë. Motrat vendosën të vinin në një bashkëpunim më vonë dedikuar dashurisë së nënës, boshllëkut që lë mungesa e saj dhe sa me fat duhet të jenë të gjitha vajzat që kanë motër./Blitz.al/
