Ka qenë një nga garat më të çmendura, nëse jo më e çmendura, e historisë së Formula 1 ajo që është zhvilluar sot në Baku, e vlefshme për Çmimin e Madh të Azerbajxhanit. Protagonistët kanë qenë Hamilton dhe Vettel, dy pilotët që mbajnë respektivisht vendin e dytë dhe të parë në renditjen e përgjithshme. Në fund, fitimtari ka qenë piloti i Red Bull, Daniel Ricciardo, i cili e ka nisur garën nga vendi i dhjetë. Në vendin e dytë ka dalë Bottas, që ka befasuar në vijën e finishit pilotin e Williams, Stroll, me këtë të fundit që është ngushëlluar me vendin e tretë. Vendi i katërt dhe i pestë është marrë nga Hamilton dhe Vettel.
“SAFETY”& FLAMURI I KUQ – Gara është ndalur nga komisarët e pistës në xhiron e 23-të (51 në total), si pasojë e aksidenteve të shumta të ndodhura, që kanë detyruar 3 herë makinën e sigurisë të hyjë në pistë. 5 makina janë detyruar të tërhiqen nga gara deri më tani, ndërkohë që spektakli nuk ka munguar, përfshi edhe një kontakt me Vettel e Hamilton, në kohën që në pistë ishte makina e sigurisë, duke u përpjekur që të “sqarohen” në pistë. Gara ka rinisur me surpriza, me një përplasje mes dy pilotëve finlandezë, Raikkonen (Ferrari) e Bottas (Mercedes), me këtë të fundit që detyrohet të futet në bokse për të ndryshuar gomat. Makina e sigurisë ka hyrë sërish në pistë për herë të dytë e më pas për një herë të tretë brenda pak xhirosh. Në xhiron e e 22-të vjen flamuri i kuq nga komisarët e pistës, që vendosin të ndërpresin përkohësisht garën, me pilotët dhe makinat që i janë drejtuar bokseve, në zonën e “pit-lane” në pritje të rifillimit të garës, ku nuk mungon tensioni mes Hamilton e Vettel. Komisarët e garës po hetojnë kontaktin mes tyre në pistë.
SHERRI – Gara e Çmimit të Madh të Azerbajxhanit është ndërprerë prej më shumë se 15 minutash për shkak të aksidenteve të shumta, por vëmendja mbetet te përplasja në pistë e Sebastian Vettel (Ferrari) dhe Lewis Hamilton (Mercedes). Nën regjimin e makinës së sigurisë, piloti britanik goditet nga pas nga rivali gjerman, që nuk e priste atë ulje drastike të shpejtësisë së pilotit të Mercedes. Dhe, për të kërkuar “sqarime”, Vettel e godet sërish Hamilton në pistë me makinën e tij, duke ngritur dhe dorën për të kërkuar një shpjegim për këtë veprim të britanikut.
