Disa gra shtatzëna kanë dhënë këtë të shtunë një mesazh për të gjithë qytetarët që mendojnë se vaksina kundër Covid-19 ndikon në fertilitet. Në një video sensibilizuese për vaksinim të shpërndarë në faqen zyrtare të Ministrisë së Shëndetësisë gratë shtatzëna apelojnë për vaksinim.
Një grua tregon se dy dozat e para të vaksinës i ka marrë përpara se ajo të ngelej shtatzënë, ndërkohë që tashmë ka marrë të tretën.
“Një grua shtatzënë ka mjaft halle, mjaft shqetësime. COVID-i nuk duhet të jetë një nga këto shqetësime përderisa kemi vaksinën në dorë. Kjo është doza e tretë sepse mendoj që kjo është faza më e mirë për dozën e tretë. Dy dozat e tjera i kam bërë para shtatzënisë, kështu që ka kaluar kohë”, rrëfen ajo.
“Gjendja ime filloi të përkeqësohet. Kur erdha këtu fëmija im ishte në rrezik dhe unë isha në rrezik. Besoj se ndoshta po ta kisha bërë dhe unë, do isha në gjendje më të mirë, do ta kisha kaluar më lehtë dhe unë nuk do kisha përfunduar në këtë situatë që jam tani”, thotë njëra prej tyre.
“Mendoj që po e po fëmija rrezikon, por rrezikoj dhe unë jetën. Duhet patjetër të vaksinohen, sidomos gratë shtatzënë. Tani që e bëra të parën jam shumë mirë, jam më e qetë”, tregon një tjetër grua e re e cila mori dozën e parë të vaksinës së COVID-19.
Që prej fillimit të vaksinimit deri më tani në vendin tonë janë aplikuar më shumë se 2 milionë e 100 mijë vaksina antiCovid të llojeve të ndryshme./Opinion.al
