Një aksident rrugor në shtetin helen i ka marrë jetën vëllait të deputetes greke së Demokracisë së Re Katerina Monogyou.
Bëhet fjalë për George Monogio, i cili mbeti i bllokuar në makinë pas aksidentit, ndërsa Ferrari i tij u shkrumbua nga flakët. Në momentin e fundit gruaja e tij arriti të dalë nga automjeti, por për 45-vjeçarin ishte tepër vonë.
Bashkëshortja e viktimës, Athena Kontopanou, po lufton me jetën në spital. Mediat greke raportojnë se gruaja, e cila është nënë e dy fëmijëve, ka fraktura të shumta në gjymtyrët e poshtme, të cilat kërkojnë një sërë operacionesh ortopedike.
Vëllai i deputetes humbi kontrollin e mjetit ‘Ferrari’. Aksidenti rrugor ndodhi në rrugën Konstantinou Karamanli nr. 175, kur Ferrari u përplas me një pemë.
Pamjet nga vendi i ngjarjes të filmuara nga kamera amatore janë tronditëse. Njerëzit dëgjohen të bërtasin dhe përpiqen të thërrasin policinë dhe zjarrfikësit për ndihmë.
Në atë moment dëgjohet një thirrje: “Vëllai im!”. Sipas mediave greke vetëm pak pas aksidentit motra e viktimës deputetja Katerina Monogyou mbërriti në vendngjarje dhe pa gjithçka.
