Osijeku, ku aktivizohet Eros Grezda, ka dhuruar një nga surprizat më të mëdha të ndeshjeve të para të turit të tretë paraeliminator të Ligës së Europës, duke mundur në transfertë me rezultatin 1-0 ekipin e PSV Eindhoven. Mesfushori i përfaqësueses shqiptare luajti të 90 minutat e kësaj sfide përballë skuadrës së njohur holandeze, në duelin që u mbyll me fitoren 1-0 të ekipit kroat. Goli i vetëm i ndeshjes u shënua me penallti nga Barisic, ndërsa Grezda u ndalua nga portieri Zoet në mundësinë që iu shfaq në pjesën e dytë të takimit.
Ndërkaq, debutimi në arenën europiane i Paolo Tramexanit me Sionin vështirë se mund të shkonte më keq. Ekipi zviceran është mundur në transfertë në Lituani përballë Suduva, në një ndeshje ku u shfaq shumë larg formës së pretenduar.
Dy gola të pësuar që në 10 minutat e para si dhe një tjetër në minutat shtesë të takimit, mbyllën ndeshjen me shifrat 3-0 në favor të Suduva, që do të jenë shumë të vështira për t’u përmbysur në takimin e kthimit në javën e ardhshme në Zvicër.
