Një avion i postës italiane “Mistral air”, i kontraktuar nga kompania “Blu Panorama”, i cili do të nisej nga Ankona për në Tiranë, është detyruar që të bëjë ulje emergjente në aeroportin e “Sanzio Falconara”, pas një shkëndije elektrike në kabinë.
Opinion.al ka publikuar dy video ekskluzive që tregojnë avionin të ulur në pistë, ndërsa njerëzit dalin të qetë dhe pa probleme. Pamjet filmike dëshmojnë se situata është zgjidhur vetëm për pak minuta nga autoritetet italiane.
Fatmirësisht të gjithë pasagjerët, rreth 86 vetë, nuk kanë patur dëmtime, por ata kanë përjetuar momente tmerri. Fillimisht u dyshua për një zjarr në sistemin e konidicionerëve, por më pas stafi sqaroi se bëhej fjalë për një masë në sistemin elektrik.
Në orën 11:25, pasagjerët u rikthyen në Ankona.
Pas më tepër se 4 orë pritjeje në terminalin e aeroportit drejtuesit e kompanisë ajrore Mistral Ernest vendosën të nisnin pasagjerët me autobus drejt Peskarës, nga aty, për të vendosur edhe orën e kthimit drejt Shqipërisë.
Mirëpo, referuar burimeve të opinion.al, pasagjerët shqiptar pritet të nisen drejt Shqipërisë pas mesnate, me shumë gjasa rreth orës 01:00 të ditës së nesërme (e shtunë).
“Vetëm 15 minuta pasi jemi nisur nga aeroporti i Ankonës konstatuam erë të djegur në bordin e avionit. Biletat i kishim prerë me Blu Panorama, por avioni ishte i Ernest Fly, pasi Blu Panorama operon me këtë kompani. Ekuipazhi na informoi se kemi probleme, dhe se zjarri kishte rënë në kabinë, ndaj duhet të kthehemi. Në aeroport na kanë pritur zjarrëfikset. Mes pasagjerëve kishte tension të madh, disa filluan të qanin”, ka dëshmuar një prej pasagjerëve për Opinion.al.
Avioni ishte nisur nga aeroporti i Ankonës me destinacion Tiranën. Ai ka bërë ulje emergjente sërish në Ankona.
Kompania ka dalë me një komunikatë për mediat pas incidentit që pësoi në fluturim paraditen e sotme, avioni me numër aterimi Mistral ATR72.
Mistral Air bën të ditur se rreth 15 minuta pas ngritjes së avionit nga aeroporti i Ankonës (ora 10:57) u ndje erë djegie në kabinë që mund të jetë shkaktuar nga një qark elektrik.
Komandanti kërkoi të kthehet në aeroportin e Ankonës, ku u ul në orën 11:28 . Pasagjerët nuk kanë pësuar asnjë dëmtim. Personeli e trajtoi me profesionalizëm rastin. Aktualisht avioni është duke iu nënshtruar kontrollit të nevojshëm teknik.
