Nuk është nga ato rrëfimet që keni dëgjuar më shpesh nga Ermali, as nga rastet kur është ai moderatori.
Në këtë intervistë të fundit, Ermali ka treguar më shumë për veten, që nga fillimet e veta e deri sot, kur e sheh veten në një pozicion të konsoliduar që ka nevojë për të administruar suksesin.
Rruga drejt këtij të fundit nuk ka qenë e thjeshtë… që nga Top Select në Top Channel, kur Ermali moderonte së bashku me Arbana Osmanin, Drini Zeqon dhe Eno Popin (atëherë kur merrte vetëm 17 mijë lekë të vjetra në muaj) e deri sot, kur është ndër showman-ët më të ndjekur të ekranit.
I ftuar në emisionin “Tek Unë”, në InTV, Ermali tregon nëse e ka ndjerë ndonjëherë se do të bëhej njeriu që është sot: “Po. E kam ditur gjithmonë. Madje në një provim në klasën e tetë, kam shkruar që dua të bëhem biznesmen dhe showman. Dhe u bëra. Unë besoj që gjerat që do vërtet të të realizohen, duhet t’i besosh dhe t’i perceptosh si realiteti yt. Dhe unë këtë kam bërë”.
Në këtë moment të jetës, kur ka në plan edhe projekte të tjera të mëdha, Ermali rrëfen edhe dy sekretet që i ka rregulla të arta: “Rregulli i parë është: ji besnik në gjëra të vogla që të të besohen gjëra të mëdha… Kështu më ka ndodhur edhe mua. Ndërsa rregulli i dytë: përulu dhe më shumë do të lartësohesh.”
Por nuk do ta lërë me kaq: “Unë kam ndërmend së bashku me një mikun tim të shkruaj një libër që të inspirojë të rinjtë dhe t’u mësojë atyre sesi të ecin në rrugën e suksesit! Ky libër do pasohet edhe me disa stand-up-e që do të vijnë në formë komedie.”
