Një shqiptar është qëlluar për vdekje në banesën e tij në Daule të Ekuadorit. Viktima i identifikuar si Adriatik Tresa, 45-vjeç, u ekzekutua të premten (20 nentor) në dhomën e ndenjes së shtëpisë së tij në rrugën León Febres-Cordero.
Ngjarja ndodhi në orët e para të mëngjesit, kur disa burra që ishin parqitur si policë hynë në kompleksin e banimit të Tresës duke drejtuar dy makina. Ata hynë në shtëpinë e shqiptarit duke pretenduar se kishin një urdhër gjykate për të kontrolluar banesën. Në atë moment në banesë ndodhej Tresa dhe kunata e tij, një grua ekuadoriane që u bë dëshmitare e ekzekutimit të shqiptarit.
Prokurori Walter Jaramillo, i cili shkoi në vendin e ngjarjes, shpjegoi se gruaja dhe i ndjeri ishin ulur në një divan kur autorët hynë në banesë. Në momentin që ajo u ngrit për t’iu kërkuar “policëve” urdhrin për kontroll, njëri nga autorët qëlloi Tresën gjashtë herë me pushkë.
Sipas hetimeve paraprake të autoriteteve kanë qenë të paktën shtatë persona që morën pjesë në vrasjen e 45 vjeçarit: dy shoferë, dy persona që ruanin jashtë banesës dhe tre të tjerë që hynë në shtëpi dhe ekzekutuan shqiptarin, i cili rezulton të jetë i martuar me një grua ekuadoriane dhe mbante dokumenta të rregullta qëndrimi në Ekuador.
Autoritetet ekudoriane zbuluan se viktima ishte pjesë e një hetimi të Njësisë Kundër Narkotikëve, si i dyshuar në përfshirjen e trafikut të drogës. Tresa ka qenë më herët i dënuar për posedim dhe armëmbajtje pa leje për gati trembëdhjetë muaj. Po ashtu, ai ka qenë nën hetim në vitin 2013 për pastrim parash./Opinion.al
