Pedagogia dhe studiuesja e njohur amerikane Lory Amy është ndaluar sot nga policia e Tiranës dhe aktualisht gjendet në komisariatin Nr.3.
Opinion.al ka arritur të sigurojë videon dhe momentin e ndalimit, ndërsa ka komunikuar me zonjën Amy, e cila ndodhet në komisarit pa e ditur përse.
Sikurse ka bërë vetë me dije, në komisariat I kanë thënë që ajo nuk është e arrestuar, por njëkohësisht nuk mund të largohet.
Zonja Amy, e cila është pedagoge në Universitetin Jugor te Xhorxhias, ndodhet në Tiranë për studimin e saj lidhur me krimet e komunizmit.
Krejt rastësisht ajo është gjendur përpara drejtorisë së Policisë së Tiranës, ku familjarët e të arrestuarve në protestën e Kukësit janë mbledhur për të kërkuar lirimin e tyre.
Sikurse vetë ka pohuar në telefon për Opinion.al , zonja ka vërejtur që në rrugën e bllokuar nga njerëzit policia lejonte hyrjen e makinave deri në një pikë të caktuar dhe më pas i detyronte ato të ktheheshin pas, duke krijuar një rreth të mbyllur lëvizjeje, që krijonte kaos në trafik.
Zonja Amy është afruar tek policët duke u kërkuar që t’i orientojnë makinat që në hyrje të rrugës e të mos i lejojnë të hyjnë në zonën e protestës, por ata kanë refuzuar.
Atëherë zonja ka dalë në rrugë dhe ka menduar të kryejë një detyrë qytetare, duke u thënë shoferëve ta shmangin zonën, sepse është e bllokuar.
“Dukej sikur policisë i interesonte ky kaos”, ka thënë zonja Amy për Opinion.al.
Ata janë afruar dhe I kanë kërkuar të largohet, por pasi ajo ka refuzuar, policët kanë vendosun ta shoqërojnë në komisariat, sikurse shihet edhe në videot e fotot më poshtë. / Opinion.alr
