Një video e postuar në rrjete sociale ku dallohej një polic që goditi me grusht një pushues në Shëngjin është bërë hit në internet. Për shkak të videos u komentua gjatë sjellja e policit, por një video e dytë e publikuar pak orë më vonë, solli një të vërtetë krejt ndryshe.
Pas pamjeve të para që ‘Jetaoshqef’ publikoi mbrëmjen e djeshme për një sherr në Shëngjin dhe pas dëshmisë së vëllait të pushuesit, vjen një tjetër version i ngjarjes. Sipas videos se dytë, nuk ishte polici zanafilla e sherrit, por familja e pushuesit nga Italia.
Drejtuesi i mjetit, i cili kishte ardhur me familjen nga Italia për të kaluar pushimet në Shqipëri, për shkak të trafikut zgjodhi të parakalonte dhe menjëherë polici i ka kërkuar të ruante krahun e tij, por shoferi zgjodhi t’i jepte gaz makinës duke i shkelur këmbën punonjësit të policisë. Menjëherë ky i fundit i ka thyer xhamin dhe i ka kërkuar të zbresë nga makina duke e nxjerrë me dhunë prej andej.
Në mes të rrugës ka nisur sherri mes tyre dhe pas disa minutave, polici ka thirrur përforcime, por deri në ardhjen e tyre, debati ka denigruar në dhunë fizike me shqelma dhe grushte nga te dyja palët. Për më tepër shikoni pamje e plota të sherrit në videon e mëposhtme.
Shoqërohet shoferi 27 vjeçar, në kërkim vëllai i tij
Policia e Lezhës ka vënë në pranga 27 vjeçarin që u shfaq në videon e publikuar në rrjetet sociale, teksa goditej me grusht nga një efektiv policie. Mësohet se 27 vjeçari Blerti Kola dhe vëllai i tij Daniel Kola akuzohen për veprën penale “Goditje për shkak të detyrës”.
Sipas policisë, polici ka reaguar ndaj dhunës së të rinjve ndaj tij. Policia e Shtetit bën me dije nga ana tjetër, se goditja e punonjësit të policisë është vepër penale dhe çdo punonjës policie , në bazë të nenit 133 të ligjit 108/2014 “Për policinë e shtetit” ka tagrin të reagojë, duke përdorur forcën, ndaj çdo shtetasi që e godet atë për shkak të detyrës.
Njoftimi i Policisë së Lezhës.
Më datë 21.08.2016 është arrestuar shtetasi Blerti Kola, 27 vjeç, banues në Lezhë, si dhe po punohet për kapjen dhe të vëllait të tij shtetasit Daniel Kola, 30 vjeç, banues në Lezhë. Nga veprimet hetimore të kryera nga oficerët e policisë gjyqësore të Prokurorisë së Rrethit Gjyqësor Lezhë, këta 2 shtetas duke udhëtuar me mjetin tip “Rover” në rrugën Shëngjin Lezhë, në bashkëpunim me njeri tjetrin, për shkak të detyrës, nuk i janë bindur urdhrit si dhe kanë ofenduar dhe goditur punonjësin e policisë të qarkullimit rrugor, inspektorin A.B., i cili pasi ka marrë ndihmën e nevojshme në spitalin e Lezhës është larguar për në banesë jashtë rrezikut për jetën.
Vepra penale “Goditje për shkak të detyres” në bashkëpunim, parashikohet nga neni 237 e 25 i Kodit Penal. Në lidhje me këtë ngjarje, eshte publikuar dhe nje video ne mediat online. Drejtoria e Standarteve Profesionale në Drejtorinë e Policisë së Shtetit, ka nisur menjëherë verifikimet për veprimet e punonjësit të policisë rrugore, si dhe po bëhet këqyrja e kamerave të ambienteve përreth për të siguruar videon e plotë te ngjarjes. Policia e Shtetit bën me dije nga ana tjetër, se goditja e punonjësit të policisë është vepër penale dhe çdo punonjës policie , në bazë të nenit 133 të ligjit 108/2014 “Për policinë e shtetit” ka tagrin të reagojë, duke përdorur forcen, ndaj çdo shtetasi që e godet atë për shkak të detyrës.
Dëshmia e vëllait të shoferit
Ditën e sotme vëllai i qytetarit te grushtuar nga polici tregon se polici i ka ndaluar pa asnjë arsye duke iu thyer edhe xhamin. Djali me iniciale G.K., thotë se vëllai i tij kishte ardhur me pushime në Shqipëri dhe në ato momente ishte duke u kthyer nga Shëngjini me të fejuarën, mbesën dhe vëllain tjetër. “Përshëndetje, jam vëllai i personit që është në video, ai ka qenë duke u kthyer nga Shëngjini me të fejuarën dhe me mbesën si dhe vëllain tjetër. Polici i ka ofenduar edhe ato janë ndalur, në momentin që janë ndalur ka ikur polici dhe u ka thyer xhamin e pasagjerit dhe ata janë ulur për të biseduar dhe në momentin që ikën për të folur, e ka goditur polici rrugor dhe e kanë dhunuar edhe në Komisariatin e Lezhës dhe janë duke e mbajtur akoma aty”, thotë vëllai i shoferit. I pyetur se cila ishte shkelja dhe arsyeja e ndalimit nga policia, ai thotë se nuk kishte asnjë shkak, duke thënë me tej se pa asnjë mëshirë i kanë lënë mbesën në mes të rrugës, ajo është vetëm 8 vjeç./ News 24
