Argjentina siguroi një biletë gjysmëfinaleje pasi mposhti me penallti Holandën, pas një takimi të mbushur me emocione, por edhe tension të lartë.
Kulmi arriti pasi u zyrtarizua gjithçka pas goditjes së penalltisë së fundit nga Lautaro Martínez. Në internet u shpërnda një foto ku lojtarët e Argjentinës talleshin me ata të Holandës.
Ndërkohë, në një tjetër video të kapur nga lartë tregohet gjithçka ndodhi. Teksa Lautaro niset nga mesi i fushës për të shkuar të godiste penalltinë, pjesa më e madhe e lojtarëve të Holandës i dalin përpara për t’i bërë presion.
Po ashtu, edhe portieri i “tulipanëve” vendoset për disa sekonda te pika e penalltisë. Megjithatë, sulmuesi nuk u ndikua aspak dhe realizoi. Lojtarët e Argjentinës nisin festën në sytë e holandezëve, madje duke i tallur ata, situatë e shoqëruar më pas me një sherr masiv mes futbollistëve të të dyja kombëtareve.
