Arben Imami është gjendur mbrëmjen e djeshme dhe paraditen e sotme në një “rrebesh” komentesh mbi deklaratën e tij të mbrëmshme në Opinion se Basha la jashtë Topallin dhe futi në parlament gra shtëpiake që kanë pjellë 3-4 fëmijë”.
Në rrjetet sociale deklarata e tij ishte më e komentuara dhe sigurisht jo për mirë. Kështu Arben Imami ka reaguar sot duke u përpjekur të sqarojë kontekstin e deklaratës së tij në “Opinion”.
Reagimi i Arben Imamit
Lindja e njeriut është ngjarja më e madhe botërore. Gruaja ka detyrimin dhe fatin e madh të amësisë, por ky është një fakt natyror, dhe i përket sferës private, familjare.
Kjo nuk do të thotë se ajo është e privuar nga jeta publike – vetëm një marksiste feministe fondamentaliste si Shulamith Firestone thotë se ajo duhet ta ndryshojë këtë kusht natyror për t’u përfshirë në jetën publike.
Krahasimi im ka qenë midis meritës publike të znj. Topalli (e cila gjithashtu ka lindur fëmijë, por kjo nuk është arsyeja e meritës së saj publike) dhe mungesës së plotë të deritanishme të jetës publike të zonjës kandidate.
Shpresoj të kemi davaritur nëse ka pasur ndonjë paqartësi dhe jo aktivizëm politik në vërejtjet e bëra.
Dashamirësisht,
Arben Imami
*Video dëgjoni se çfarë tha Imami mbrëmë në lidhje direkte me studion e “Opinion”
