Ministri për Zhvillim dhe Turizëm i Malit të Zi, Pavlle Radulloviç, dha dorëheqje, pas shfaqjes së një videoje, e cila tregonte inspektorë të ministrisë së tij duke marrë ryshfet nga një biznesmen.
Në videon e transmetuar në një televizion lokal, inspektorët dëgjohen duke kërkuar para nga një burrë, i cili dëshiron të vazhdojë ndërtimin e një ndërtese në qytetin e Budvës, edhe pse i ka skaduar leja.
Kur njëri nga inspektorët pyet: “A i keni sjellë?”, biznesmeni thotë se ka vetëm 5 mijë euro, edhe pse shuma totale që është kërkuar thuhet se ka qenë 20 mijë euro.
“M’i jepni nën tryezë”, dëgjohet të thotë inspektori.
Ministri Radulloviq, në këtë detyrë prej vitit 2016, njoftoi në një konferencë për media se do të japë dorëheqje për shkak të incidentit.
“Unë nuk kam arritur ta zhduk këtë lloj sjelljeje”, tha ai dhe shtoi se procedurat disiplinore tashmë kanë nisur.
Korrupsioni dhe krimi i organizuar janë dy nga sfidat më të mëdha, me të cilat përballet Mali i Zi, vend që synon të bëhet anëtar i Bashkimit Europian. /Opinion.al
