Kreu i grupit Parlamentar të PS-së, Taulant Balla ka komentuar videon e publikuar nga gazetari Artan Hoxha për kryetarin e Bashkisë së Bulqizës, i cili është duke konsumuar kokainë. Ai tha se fillimisht duhet të flas SPAK, dhe më pas Partia Socialiste.
“Në asnjë rast PS nuk ka marrë dhe nuk do të marrë askënd në mbrojtje. Nuk di pistat por dua ta mbështes. Mezi presim sapo prokuroria të ketë ngritur akuza të caktuara reagimi ynë do të jetë i ashpër. Si çdo qytetar i Bulqizës për një rast të tillë ndjejmë neveri nëse vërtetohet por do ndjejmë neveri për rastet kur parti të caktuara përdorin videomontazhe për të dëmtuar palën tjetër. Nëse prokuroria vërteton çdo lloj akuze dënimi do të jetë maksimal”, tha Balla.
LEXO EDHE- Lefter Alla paralajmëroi se do ta padiste, përgjigjet Ervin Salianji
Edhe Kryetarja e Komisionit të Sigurisë Kombëtare, Ermonela Felaj e cilësoi të papranueshme videon e publikuar në media. Felaj tha se nëse është e vërtetë, ai duhet të largohet nga posti.
“Unë nuk dua të paragjykoj, më vjen mirë që ka reagim shoqëror, isha e bindur që do të kishte dhe kjo do të thotë se sjellje të tilla janë të papranueshme kushdo që t’i kryejë. Reagimi shoqëruar të rrënon dhe veprimi është më i shpejtë nga ai që sjell ligji, që është abstrakt dhe të përcaktojë çdo lloj situate. Nëse dikush thyen rregullat e punës, nuk meriton që ta ushtrojë më këtë funksion. Ka lidhje me gjestin dhe të qenit përdorues, nuk përshtatet me detyrën e funksionarit publik. Rasti konkret është duke u hetuar nga SPAK”, deklaroi Felaj.
Prokuroria Speciale Anti-Korrupsion nisi të enjten hetimet për kryebashkiakun e Bulqizës, Lefter Alla, pas publikimit nga Televizioni ABC NEËS të një videoje, ku ai shfaqet duke thithur kokainë.
Gazetari i njohur Artan Hoxha, thotë se “pamjet janë marrë nga një kamera sigurie në një mjedis publik disa kohë më parë dhe SPAK ka nisur hetimin mbi faktin e videos së publikuar”./ Opinion.al
