Ekipet e shpëtimit në Kinë kanë nxjerrë të gjallë 11 minatorë, të cilët ishin bllokuar për dy javë në një thellësi 600 metra nën tokë, raportuan mediat shtetërore kineze.
BBC raporton se minatorët kishin ngecur në minierën Hushan pas një shpërthimi në tunelin hyrës. Ngjarja ndodhi në provincën Shandong në 10 janar.
Një total prej 22 minatorësh ishin bllokuar në shpërthim. Të paktën një nga ata ndërroi jetë, ndërsa ende nuk është e qartë nëse 10 të tjerët janë gjallë nën tokë.
Minatori i parë u shpëtua të dielën në mëngjes. BBC raporton se ai ishte në “gjendje jashtëzakonisht të dobët” dhe u dërgua menjëherë në spital.
Rreth një orë pas shpëtimit të tij, tetë minatorë të tjerë u nxorën nga një pjesë më e thellë e minierës, ndërsa njëri prej tyre u plagos.
Disa të tjerë u panë duke ecur vetë, të ndihmuar nga ekipet e shpëtimit, para se të transportoheshin në spital.
Pamjet e bëra publike nga mediat në Kinë tregojnë momentin kur ekipi i kërkim-shpëtimit nxjerr minatorin e parë dhe të gjithë brohorasin kur kuptojnë se fatmirësisht ai është ende gjallë. Ndërkohë po vijojnë hetimet për të zbuluar shkaqet e shpërthimit në minierë.
Miracle of life: A Chinese miner has been rescued two weeks after being trapped hundreds of meters underground in Shandong Province. #GLOBALink pic.twitter.com/NXmX7oooJd
— China Xinhua News (@XHNews) January 24, 2021
