Dita e djeshme ka qenë pushim për kuqezinjtë. Pasi janë kthyer nga Marseja në Perros Gurec, ku është rezidenca e tyre në “Euro 2016”, lojtarët e kombëtares kanë dalë xhiro nëpër qytezën e vogël, duke larguar sadopak zhgënjimin që la humbja “in extremis” ndaj Francës. Po ashtu, e djeshmja ka qenë e veçantë edhe në një aspekt tjetër. Trajneri De Biazi ka festuar 60-vjetorin e lindjes.
Përmes një feste mes veti, në kampin kuqezi, trajneri i kombëtares ka marrë urimet nga lojtarët e tij, si dhe nga drejtuesit e FSHF-së atje. Një tortë e madhe, me ngjyrat kuqezi, me flamurin e Shqipërisë të “stampuar” në këtë ëmbëlsirë, që ka ëmbëltuar të gjithë të pranishmit nga pak, ka ardhur në duart e presidentit të FSHF-së, Armand Duka, si dhuratë për 60-vjeçarin nga Sarmede. Pra, Duka ka bërë në njëfarë mënyre “kamarierin” e De Biazit në këtë ditë të shënuar, duke i uruar atij edhe shumë vite të tjera të lumtura, me suksese.
Ja premtimi i De Biasit para Kombëtares
Duka: Atëherë na thuaj dëshirën
De Biasi: Dëshira?! Të kualifikohemi të dielën mbrëma
Jo doja tju thoja me të vërtetë. Shshshtttt
Doja të thoja që jam me të vërtetë i kenaqur, pavarësisht rrethanave, se si i përballuam këto dy ndeshje, që kemi bërë fillimisht.
Futbolli ka atë aftësi që nuk të kthen pas atë që duhet të kesh dhe unë besoj që me Zvicrën dhe sidomos dje mbrëma mund të kishit çuar në shtëpi një tjetër rezultat. Jam krenar që jam trajneri juaj, dua të jem krenar edhe të dielën në mbrëmje dhe dua të shoh ndeshje pavarësisht rezultatit.
Shkojmë në fushë, duam të jemi aty, dhe të tregojmë që nuk jemi të dytët e askujt, dhe të tregojmë determinimin që treguam edhe mbrëmë (me Francën) dhe me cilësi sepse ju keni shumë cilësi. Sipas meje ju nuk e kujtoni shpesh, por ju keni shumë cilësi.
