Xhanluixhi Donaruma mori pjesë në një emision për fëmijë, ku iu nënshtrua një sërë pyetjesh nga vogëlushët e pranishëm. Me naivitetin e tyre, shpeshherë ata mund të vënë në vështirësi edhe të rriturit duke formuluar gjithfarë pyetjesh që vetëm mendja e një fëmije mund të prodhojë.
Pyetjes se përse refuzoi Realin e Madridit ku mund të luante me Ronaldon apo përse nuk zgjedh Interin, gardiani kuqezi iu përgjigj: “Milani është shtëpia ime, ndaj e pata të lehtë zgjedhjen. Mendoj se kam bërë gjënë e duhur. Tek Interi nuk do të shkoja kurrë”. Natyrshëm mes të ftuarve të vegjël lindi pyetja se përse tha fjalën “kurrë”.
Drejtuesi i emisionit, Paolo Bonolis, një interist i deklaruar, sqaroi se tek Interi do të merrte vetëm 20 euro dhe jo 24 që do të arkëtojë për katër vitet te Milanit. Shuma sigurisht është në miliona, por, për të argëtuar fëmijët, të tilla sakrifica mund të bëhen, të paktën në televizion.
Një tjetër fëmijë rrëfeu se kishte vënë bast për largimin e Xixhos drejt Juventusit, por 18-vjeçari e njoftoi se ishte një bast i humbur pasi kishte akoma katër vite kontratë me Milanin. Sa më shumë Xhixho përgjigjej, aq më shumë kureshtarë bëheshin fëmijët duke shtuar dozën e çudisë në pyetjet e tyre.
Një pyetje tjetër mjaft e këndshme ishte se zgjedhja për t’u bërë portier kishte të bënte me faktin që nuk ishte i zoti të luante futboll me këmbë. I sinqertë deri në fund portieri kuqezi që tha se roli i tij ishte diçka që i kishte ndodhur natyrshëm, pavarë- sisht se pranoi se me këmbët nuk ishte shumë i zoti.
Një vajzë e vogël bëri një nga pyetjet që shkaktoi më shumë të qeshura në sallë teksa pyeti Donarumën nëse kishte shokë në ekip që i mbanin erë këmbët. Diplomatik në këtë rast, portieri i Milanit mohoi aromat e këqija në dhomat e zhveshjes së ekipit të Montelës. Morisë së kurioziteteve të fëmijëve nuk po i vinte fundi, por, me ndërhyrjen e drejtuesit Paolo Bonolis, erdhi dhe pyetja e fundit e një tjetër fëmije: “Ti luan futboll për të mos vajtur në shkollë?”.
Donaruma sqaroi rëndësinë e shkollës dhe premtoi diplomimin e tij në vitin e ardhshëm. Teksa diploma në jetë do të vijë pas 12 muajsh, portieri kuqezi për të argëtuar intervistuesit e tij pranoi të zgjidhte edhe një problem matematikor për t’u “diplomuar” më pas nga vogëlushët.
Pavarësisht lehtësisë së ekuacionit, Xhixho vonoi disi në përgjigjen që duhet thënë se ishte e saktë me portierin që mori nga 100 pikë të mundshme vetëm 99… sigurisht edhe për hir të numrit në fanellë.
