Rikthimi në banesë i Artur Kurtit nuk u prit mirë nga bashkëshortja, djali dhe kunati i tij, që jetonin bashkë në katin e gjashtë të këtij pallati në rrugën “Zef Jubani” në kryeqytet.
Sipas policisë, 50 – vjeçari hyri me thikë në dorë në banesë dhe pas një debati u përlesh me djalin dhe kunatin.
Në një video të filmuar pak minuta pas krimit, në korridorin e apartamentit duken shenja gjaku dhe një batanije.
Policia thotë se Artur Kurti gjeti vdekjen në rrethana të paqarta, si pasojë e plagëve të marra në përleshje e sipër.
Nga përleshja mbeti i plagosur edhe kunati i viktimës, Leonard Ristani, 43 – vjeç i cili u transportua në gjendje kritikë për jetën në Qendrën Spitalore Universitare “Nënë Tereza”.
Paraprakisht, si autor të dyshuar të ngjarjes policia ka shoqëruar djalin e viktimës, Jurgen Kurtin, 23 – vjeç.
Megjithatë policia po kryen veprimet hetimore për të vërtetetuar nëse Artur Kurti është qëlluar nga djali apo kunati i tij.
Nga të dhënat mësohet se, çifti Kurti ishte në proces divorci dhe që prej Dhjetorit, viktima Artur Kurti, ishte larguar nga banesa. /Tv Klan
