Në gjykatën e krimeve të rënda ka nisur seanca gjyqësore për masën e sigurisë ndaj 11 personave të arrestuar pas protestës së të enjtes të banorëve të Astirit. Të afërmit e banorëvve janë mbledhur përpara gjykatës, ku janë edhe përfaqësues të opozitës, deputetë të PD dhe LSI. Këta të fundit kanë arritur të hyjën në sallë, pas një debate me forcat policore të vendosura në hyrje të gjykatës.
Ndërkohë, të afërm të personave të arrestuar nga policia përpara mediave janë shprehur të indinjuar dhe kanë hedhur fyerje, akuza e madje edhe mallkime per Kryeministrin Rama, të cilin e fajësojnë direkt për prishjen e shtëpive të tyre.
“Protestoj për Kryeministrin. Shpiat po na i prish edhe djemtë po na i merr. Po na vret gjithë popullin. Këta janë provokues. Turp për Edi Ramën. Pa polici i kemi patur të qeta protestat. Nuk jena shpellarë, tokën e kemi blerë, taksat ja paguajmë”, u shpreh një banore e moshuar për gazetaren Klodiana Lala.
Ndërkohë, nëna e 17-vjeçarit të arrestuar së bashku me protestuesit e tjerë, tha se djali i saj është dhunuar në rrugë dhe në ambjentet e komisariatit.
