Kjo është historia e 7-vjeçarit Leo, nga fshati Kalivaç i Njësisë Administrative Baz në Bashkinë e Matit. Ai vuan nga një sëmundje e rrallë, për shkak të së cilës tashmë rrezikon të mbetet i paralizuar. Një familje në pamundësi ekonomike, e cila kërkon mbështetje dhe ndihmë, nga kushdo që mundet ta ofrojë atë sadipak.
Në një kronikë të transmetuar nga Balkanëeb, kupton se Leo nuk mund të ketë një jetë normale. Ai nuk mund të shkojë në shkollë e të luajë si gjithë bashkëmoshatarët shkak se nuk mund të ecë dhe nuk mund të qëndrojë në këmbë për një kohë të gjatë.
Pasi lindi Leo 7 vjeçar u diagnostikua me anemi të theksuar e cila bëri që më vonë t’i shtoheshin problemet e tjera. Nëna e tij, Loriana e vuan më shumë sëmundjen e djalit dhe tregon se i ka bërë disa vizita, por mjekët nuk ia kanë përcaktuar ende sëmundjen e rrallë të djalit 7 vjeçar, ndërsa ai çdo ditë humbet fuqinë për të përdorur këmbët.
“Që në moshë të vogël djali ka ardhur i pa zhvilluar, probleme veç anemi më kanë thënë. I kam marrë shumë ilaçe, vitamina, ilaçe kockash ka marrë por prapë çohet me vështirësi. Në Tiranë na thanë që ka sëmundje muskujsh”, shprehet ajo
Për shkak të gjendjes së vështirë ekonomike, Loriana thotë se e ka të pamundur të kryejë vizita të tjera, ndërsa me lot në sy shpreh frikën se djali i saj mund të paralizohet.
“Nuk dihet se çfarë sëmundje është, kërkoj të na ndihmojë kush të ketë mundësi që t’i bëjmë ca analiza”,- thotë e ëma me lot në sy.
Gjyshja e Leos, Hanke Cakoni thotë se familja e djalit të saj prej katër anëtarësh, jeton vetëm me 5 mijë lekë të reja ndihmë ekonomike.
Megjithëse me shumë vështirësi për të lëvizur këmbët, Leo e përcjell deri jashtë banesës grupin e xhirimit, me shpresën se dikush do ta ndihmojë që edhe ai të ketë mundësinë të ecë e të jetojë jetën si gjithë fëmijët e moshës së tij.
Balkanweb, publikon edhe një numër, përmes të cilit qytetarët që duan mund të kontribuojnë për ta ndihmuar vogëlushin 7-vjeçar. Ata mund mund të kontaktojnë me të atin, Xhevahir Cakoni në këtë numër telefoni: 0685254740.
