Ndonëse shkolla e lartë nuk është një detyrim ligjor për të qenë pjesë e Kuvendit të Shqipërisë, një pjesë e deputetëve kanë nxituar t’a përfundojnë atë sapo kanë hyrë në politikë, ndërsa të tjerë në pamundësi duket se janë përpjekur të gjejnë mekanizma për ta shmangur këtë detaj, qoftë edhe në mënyrën se si prezantojnë CV-të.
Kështu në një vështrim të shpejtë të faqes zyrtare të Kuvendit, vëren se mënyra se si deputetët paraqesin CV-të e tyre nuk është e unifikuar në pikëpamje të strukturës.
Ka deputetë CV-të e të cilëve shkojnë në disa faqe, dhe të tjerë që nuk mbushin as një faqe. Ka deputetë me CV që nuk paraqesin vite dhe të tjerë që i japin ato të detajuara.
Në një vështrim të emisionit Opinion, vërehet se ka një numër të madh deputetësh, të cilët ndonëse kanë studiuar jashtë vendit, kanë ndjekur universitete të cilët nuk janë shumë selektivë në pranimin e studentëve, si, psh: Nebraska Linklon University që pranon 76.4% të aplikantëve apo Sorbonne Nouvelle që pranon 100% të aplikantëve, ndërkohë që Universiteti i Tiranës pranon 20-30% të aplikantëve.
Në CV-të e deputetëve Nard Ndoka apo Tom Doshi thuhet vetëm se kanë përfunduar arsimin e lartë, ndërkohë që deputeti Dritan Bici shënon si eksperiencë pune, edhe përvojën në parti.
Në faqen e kuvendit shihet gjithashtu se ish-ministri i Bujqësisë Niko Peleshi i kthehet studimeve pas gati 10 vjetësh ndërprerje, ndërkohë që deputeti Sadri Abazi shënon si diplomë një kurs për kamionë të kryer në Zvicër pranë Unionit ndërkombëtar të rrugëve që trajnon shoferët dhe operatorët e transportit.
Me mungesa paraqitet edhe CV-ja e deputetit Rrahman Rraja, i cili pas përfundimit të shkollës së mesme në vitin 1980, kryen studimet e larta 23 vite më vonë, ndërsa nuk ka asnjë të dhënë për aktivitetin e kryer në këto 20 vite. Konstatohet se Zoti Rraja e ka nisur universitetin pikërisht në Kohën kur është zgjedhur kryetar i komunës Nikël.
Edhe deputeti Lefter Koka, sipas asaj që ka vetëdeklaruar në KQZ, rezulton të jetë diplomuar në universitetin e Strugës, disa vite pasi ishte zgjedhur kryetar bashkie.
