Deklarata e Kryetarit të Komisionit Qëndror të Zgjedhjeve, Denar Biba se implementimi i teknologjisë është i pamundur në zgjedhjet e 18 qershorit, ka sjellë reagimin e ashpër të përfaqësuesve ligjor të Partisë Demokratike.
Në emër të opozitës Njazi Kosovrasti kërkoi dorëheqjen e kreut të KQZ-së.
Njazi Kosovrasti, përfaqësues ligjor i PD-së në KQZ: Jep dorëheqjen ti, nuk mund të thuash që teknologjia në zgjedhje nuk bëhet. Kjo nuk është detyra jote, thuaj që se bëj dot këtë punë.
Denar Biba mbajti të njëjtin qëndrim me atë të së dielës kur u shpreh se për votimin elektronik duhen të paktën 20 muaj kohë.
Denar Biba, Kryetar i KQZ-së: Nuk bëhet dot pesë muaj para zgjedhjeve, se koha nuk është e mjaftueshme. Kjo është qesharake. Nuk ka kohë.
Kundër Bibës doli edhe nënkryetari i KQZ-së Hysen Osmani. Debati ndodhi në mbledhjen e thirrur nga KQZ-ja për shpërndarjen e fondit prej 290 milion lekësh që buxheti i shtetit ka vënë në dispozicion të partive politike për zgjedhjet parlamentare të 18 qershorit./ TV Klan
