“Dashuri, Shpresë, Dritë” titullohet libri i modeles shqiptare Anxhela Martini, i cili vjen si një rrëfim për të kaluarën e saj si dhe të nënës së saj. E ftuar në emisionin “Opinion” me drejtues Blendi Fevziun, Martini, ndau gjatë intervistës subjektin e librit, i cili është e kaluara e dhimbshme dhe e vështirë jo vetëm e saj, por kryesisht e nënës së saj.
I publikuar në fillim në anglisht tashmë “Dashuri, shpresë, dritë” është publikuar edhe në shqip. Rrëfimi i Martinit nis me martesën e parë të së ëmës në moshën 20-vjeçare dhe vijon me lindjen e vëllait të saj të madh e më pas divorcin. Mirëpo siç rrëfehet në libër e ëma u martua sërish me bashkëshortin e parë dhe pasi lidhja e tyre nuk funksiononte më u ndanë përfundimisht.
“Ajo ka qenë shumë e paragjykuar. Mamaja ka bërë gjëra të vështira në kohën e komunizmit dhe unë e adhuroj për këtë fakt,”-thotë Martini.
Ndonëse ndihej e paragjykuar sërish nëna e modeles së njohur vijoi rrugën e saj. Në libër tregohet rreth martesës së dytë të nënës së saj, pikërisht me babain e Martinit me të cilin kishin një diferencë moshe prej 10 vitesh, ku ai ishte më vogël. Megjithatë martesa e tyre nuk po funksiononte mirë dhe i ati vendosi të emigroj në Zvicër.
Kështu që ata u vendosën të tre në një kamp në Zvicër, por ndonëse Anxhela ka qenë vetëm 4 –vjeç dhe nuk e kujton mirë atë kohë, ajo di prej nënës së saj që jetonin në kushte jo të mira dhe për këtë arsye vendosën që të kthehen në Shkodër, deri sa i ati të stabilizohej. Kështu Anxhela dhe nëna e saj u kthyen në Shkodër ku modelja jetoi vitet e fëmijërisë deri në moshën 10-vjeçare. Sipas saj ato ishin vitet më të bukura pasi ishte e rrethuar nga dashuria e të afërmve dhe miqve.
“Kam pas shumë dashuri, kam patur liri, kam patur kushërinjtë e mi, shkollën, gjyshërit. Nuk e ndjeja situatën e mjerimit atëherë, nuk e kuptoja, të gjitha dëshirat që kisha mi plotësonin,”-tha ajo. Në vijim të rrëfimit Martini tregon se cila ishte ngjarja e frikshme që ndodhi në vitin 1996, çka e bëri të ëmën të merrte vendimin për t’a dërguar tek babai i saj në Zvicër.
Një ditë teksa ishte duke luajtur me një shoqen e saj një burrë i afrohet dhe i bën disa pyetje rreth familjes e më pas i thotë të shkojë me të për t’i blerë akullore. Anxhela rrëfen se pak më tutje ajo dalloi një makinë që e priste me një burrë tjetër brenda dhe e kuptoi që do ta rrëmbenin, për këtë arsye i kafshoi dorën burrit që kishte përballë dhe u largua. Por duket se vuajtjet nuk kishin përfunduar për modelen. Pasi shkoi tek i ati në Zvicër ajo tregon se u përball me gruan e dytë të tij një zvicerane,e cila sipas Martinit e keqtrajtonte, duke e krahasuar veten me përrallën e “Borëbardhës”.
Për arsyen se i ati nuk e besonte, Anxhela vendosi të mos tregonte asgjë rreth keqtrajtimeve.
“Njerka nuk më donte. Jo vetëm tek ngrohtësia, por mashtrimet, shpikjet. Babai nuk më besonte në fillim edhe atëherë unë e lashë këtë punë dhe e kam mbajtur sekret derisa jam bërë 18 vjeçe derisa ja tregova nënës sime”, -tha Martini. Gjithashtu gruaja e dytë e bashkëshortit ia kishte ndaluar përmes autoriteteve në Zvicër ardhjen e nënës së Anxhelës tek e bija. 9 muaj kaluan pa u takuar dhe pa folur me njëra-tjetrën.
E teksa e dëshpëruar nëna e Anxhelës kërkonte një zgjidhje për të shkuar në Zvicër dhe takuar të bijën, një nxënësja e saj e adresoi tek i vëllai, i cili jetonte në Zvicër. Ai njihte tek vendi i tij i punës, një burrë zviceran të pamartuar dhe i tregoi për nënën e Anxhelës.
Në fillim atij iu duk e çuditshme të martohej me dikë që nuk njihte, por pasi mësoi historinë e saj vendosi për po, pavarësisht të gjithave do të ndihmonte një nënë. Anxhela tregon që kur ata janë parë për herë të parë në aeroport ka qenë dashuri me shikim të parë dhe tashmë kanë më shumë se 20 vjet së bashku.
Mirëpo babai nuk donte që Anxhela të jetonte me të ëmën dhe e paralajmëroi për diçka të tillë. Për të mos shkaktuar probleme Anxhela asokohe 11-vjeçe i tha të ëmës se nuk donte të jetonte me të. Në moshën 18-vjeçare ajo vendosi të krijojë jetën e saj dhe të largohej nga shtëpia.
Në libër gjithashtu rrëfehet historia sesi ajo nisi hapat e para të modelingut, profesion të cilit e ka patur pasion që në moshë të vogël. Këtë libër e ëma e ka pritur shumë e emocionuar, ndërsa për të atin shumë gjëra do të jenë surprizë, të rrëfyera pas kaq vitesh.
Përmes këtij rrëfimi të ndjerë modelja kërkon të bëjë dhe një apel për të gjitha gratë që kur e shohin që jeta e tyre nuk po shkon si duhet në një marrëdhënie të kenë guxim dhe t’a lënë atë lidhje për të mos vuajtur më dhe gjithashtu të mos mendojnë se çfarë do të mendojnë të tjerët. Libri i modeles Anxhela Martini do të jetë në Panairin e Librit, i cili çel siparin ditën e sotme./Opinion.al/
