Kryetari i Bashkisë së Durrësit ka shpjeguar çështjen e punësimit të Lulzim Berishës, ish-kreut të bandës së Durrësit, i cili ka fituar lirinë me kusht nga Gjykata e Apelit në qytetin bregdetar. Vangjush Dako interesit të gazetarëve, iu përgjigj se Berisha do të kryejë punë vullnetare në një nga ndërmarrjet e Bashkisë si ajo e pastrim gjelbërimit, dhe nuk do të paguhet për punën e tij në shërbim të komunitetit.
Sipas Dakos, angazhimi i Lul Berishës është një procedurë standarde që Bashkia e Durrësit e aplikon me çdo të burgosur në liri me kusht.
“Ka një procedurë që çdo i dënuar që dënohet me dënim alternativ, që do të thotë me një punë vullnetare në komunitet, ne i ofrojmë punën në ndërmarrjet tona të shërbimeve, në ndërmarrjen komunale të pastrimit të plazhit, të pastrimit të qytetit, të dekorit apo të gjelbërimit. Punë vullnetare, ata punojnë pa shpërblim nga ana jonë sepse e kanë dënim nga gjykata.Nuk ka marrë vendim gjykata akoma se ku do të punojë i dënuari Berisha. Këto janë procedura rutinë të përditshme“, tha ai.
Një ditë më parë, agjencia BIRN në një shkrim të saj deklaronte se një nga faktorët që kishte ndikuar në vendimin e gjyqtarëve për lirimin me kusht të Lulzim Berishës kishte qenë garancia e tij për punësimin e Lulzim Berishës në Bashki.
Në vendimin e Gjykatës së Apelit shkruhet se “Bashkia Durrës, duke vlerësuar gjendjen e kësaj familjeje, sjelljen e tyre në komunitet, si dhe mundësinë e lirimit të të dënuarit, garanton punësimin e të dënuarit Lulzim Berisha, në pamundësi për tu punësuar në ndonjë subjekt privat”.
