Klubi luzitan njoftoi se uruguajani ka një “plagë të thellë në këmbë”, ndërsa hulumtimet e mëtejshme mjekësore, të kryera sot, tregojnë për një ndalesë të gjatë të mundshme. Pas udhëtimit fitimtar në “Olimpico”, ndaj Romës, në “play-off”-in e Ligës së Kampioneve, Porto është kthyer në shtëpi. Pritja në aeroport ka qenë tejet entuziaste, edhe pse për klubin në fjalë portugez ngre shumë shqetësime situata e Maxi Pereira, viktimë e De Rossit.
Ky i fundit kreu një ndërhyrje të ashpër, çka e detyroi gjyqtarin polak të ndeshjes ta nxirrte direct me karton të kuq kapitenin verdhekuq. Siç është raportuar nga “A Bola”, uruguajani zbriti nga avioni dhe u largua nga aeroporti në një karrige me rrota, i shoqëruar nga dëshirat e tifozëve të pranishëm për një shërim të shpejtë. Ai i ka befasuar të gjithë me lojën e zhvilluar, ndaj mbështetësit e Portos e konsiderojnë Maxi Pereira një luftëtar, që nuk dorëzohet kurrë.
Megjithatë, pamjet e ndërhyrjes brutale të De Rossit dhe të tij në karrigen me rrota flasin vetë… Në vlerësimin paraprak të demit, me shumë gjasa bëhet fjalë për një frakturë të keqe. Pothuajse me siguri, Maxi Pereira do të mungojë në ndeshjen kundër Sporting Lisbonë, të dielën, dhe më gjerë. Teste të tjera mjekësore janë planifikuar në vazhdim, me shpresën se dëmtimi mund të jetë më pak serioz nga sa duket.
