Policia e Tiranës ka nxjerr në terren “Shqiponjat” dhe Forcat Operacionale Speciale. Nuk dihen ende motivet e këtij operacioni “blic”, por ajo ç’ka u ofrua për mediat është arrestimi i dy personave që lëviznin me pistoletë pa leje. Po kështu janë shoqëruar për kontroll 22 persona që kanë patur preçedentë penalë të mëparshëm.
Mbrëmë rreth orës 22:30, në rrugën “Petro Nini Luarasi” gjatë kontrollit fizik të ushtruar shtetasit Dritan Aga, 37 vjeç iu gjetën dhe u sekuestruan një armë zjarri pistoletë, një krehër me 10 fishekë, 4 doza me lëndë të dyshuar narkotike e llojit “Cannabis Sativa”.
“Shtetasi Dritan Aga u arrestua në flagrancë për veprat penale “Prodhimi dhe mbajtja pa leje e armëve luftarake dhe e municionit”, si dhe “Prodhimi dhe shitja e narkotikëve”, njoftoi policia e kryeqytetit.
Ndërsa në rrugën “Dritan Hoxha”, tek sheshi “Karl Topia” gjatë kontrollit të ushtruar në mjetin tip “Seat”, që drejtohej nga shtetasi Enver Sylaj, 27 vjeç, nga Tropoja u gjet dhe u sekuestrua në cilësinë e provës materiale një armë zjarri pistoletë me dy krehëra me 14 fishekë.
Shtetasi Enver Sylaj u arrestua në flagrancë për veprën penale “Prodhimi dhe mbajtja pa leje e armëve luftarake dhe e municionit” parashikuar nga neni 278 i Kodit Penal.
“Kontrollet do vijojnë në kohë dhe orare të ndryshme në të gjithë territorin e qarkut Tiranë, për parandalimin dhe goditjen e paligjshmërisë, me qëllim rritjen e parametrave të sigurisë”, theksohet në njoftim. /Opinion.al
*Pamje të arrestimeve
