Policia e Shtetit bën të ditur se ka kryer kontrolle blic në lokalet e natës dhe në rrugë për të kapur kontigjentët kriminalë. Kështu në Lushnjë është kapur një shpërndarës i drogërave të forta, ndërsa 12 të tjerë u shoqëruan për verifikim.
“Gjatë kontrolleve në lokalet e natës nga FNSH dhe policia lokale, u shoqëruan për verifikim 12 persona. Në vijim të punës për kapjen e personave në kërkim, të atyre që qarkullojnë me armë zjarri apo që tentojnë të shpërndajnë lëndë narkotike, u bë i mundur arrestimi në flagrancë i shtetasit Redjon Caushi, 24 vjeç, banues në Lushnje”.
Sipas njoftimit të policisë, arrestimi i këtij shtetasi u bë pasi në lokalin “Bar lloto” në pronësi të tij në qytetin e Lushnjes, u gjetën të fshehura në një vend të përshtatur në mur 12 doza lëndë narkotike të dyshuara Kokainë. Në cilësinë e provës materiale u sekuestrua edhe një shkop gome i ngjashëm me atë që përdorin punonjësit e policisë.
Delvinë-Sarandë
Policia Lokale e mbështetur nga FNSH gjatë kontrolleve në rrugë e lokale ka kapur një shtetas të shpallur në kërkim ndërkombëtar për vjedhje në shuma të mëdha të parave kryer në Greqi.
“Në pranga ka rënë Aleks Çoba, 48 vjeç, banues në fshatin Rusan, Delvinë, i shpallur në kërkim ndërkombëtar për vjedhje në shuma të mëdha parash deri në 400 mijë euro në shtetin grek. Për këtë shtetas u ekzekutua Vendimi penal datë 20.09.2018 i Gjykatës së Rrethit Gjyqësorë Sarandë, e cila i ka caktuar masën e sigurisë “Arrest në burg” për veprën penale “Vjedhja” .
Gjithashtu po gjatë kontrolleve nga Policia e Sarandës u kap dhe u arrestua në flagrancë shtetasi:
“Dritan Hyseni, 19 vjeç, banues në Sarandë, pasi gjatë kontrollit fizik dhe të mjetit me të cilin qarkullonte pa leje drejtimi përkatëse u konstatua një sasi lënde narkotike në total 37.1 gramë e dyshuar si “Kokainë”.
