Vendimi i qeverisë për taksimin e çdo blerje online mbi 22 euro dhe të gjitha dërgesat postare mbi 45 euro ka sjellë sorollatje për qytetarët. Nëse me ligjin e vjetër për të njëjtat blerje pakot merreshin në postë pa patur nevojë të kryesh veprime të tjera, me uljen e kufirit të tatueshëm nga qeveria këto qytetarë duhet të trokasin në disa dyer.
Ajo që e bën edhe më të vështirë këtë proçes është fakti se shërbimi për të marrë pakot që kalojnë kufirin e pataksueshëm, është vetëm një në Tiranë, e cila shërben për të gjithë Shqipërinë.
Ditë më parë Posta Shqiptare premtoi se nga data 22 Gusht do të ofrohej në qytete të ndryshme të vendit kryerja e shërbimit për veprimet e zhdoganimit dhe pagesa për të tërhequr objektet postare. Por siç pohohet edhe nga vetë qytetarët një gjë e tillë ende nuk ka nisur. Burime nga Posta Shqiptare thonë për Tv Klan se janë ende duke punuar për të finalizuar një sistem të tillë.
Tv Klan
