Ditën e sotme ministrja e Shëndetësisë, Ogerta Manastirliu ka publikuar në “Facebook” një video ku pacientët me COVID-19 komunikojnë me familjarët e tyre.
Ministrja thotë se janë vendosur në dispozicion tableta të posaçme që pacientët dhe familjarët të komunikojnë përmes video-telefonatave. Sipas Manastirliut, stafi mjekësor përveç ndihmës profesionale, kujdeset dhe për gjendjen emocionale të pacientëve.
Në videon e publikuar nga ministrja, dëgjohen se si familjarët inkurajojnë të afërmit e tyre të infektuar me COVID-19. “Jemi shumë mirë, edhe ti do të bëhesh mirë fare, pa merak fare. Si dukesh mirë, shyqyr, shyqyr, mashalla”-shprehen familjarët.
“Në situatën e pandemisë në gjithë spitalet Covid, stafet mjekësore veç dedikimit dhe kujdesit profesional për pacientët, janë kujdesur në çdo moment, që të komunikojnë me familjarët për t’i informuar për gjendjen shëndetësore të pacientëve që ndjekin, për çdo pëmirësim apo shqetësim në lidhje me gjendjen shëndetësore të tyre. Veç terapive të mjekimit dhe ndjekjes së gjendjes klinike për çdo pacient, po kujdesemi dhe për mbështetjen emocionale dhe sociale të pacientëve nëpërmjet vendosjes të komunikimit të tyre direkt me familjarët. Kemi vendosur dhe mënyrë tjetër komunikimi, përmes tabletave të posaçme për video-telefonata, për t’ju dhënë zemër dhe mbështetje pacientëve të shtruar në spital me COVID-19, nga familjarët e tyre, që presin me padurim të komunikojnë me të afërmit dhe t’i përcjellin dashurinë dhe mbështetjen në këto momente.”-shkruan Manastirliu.
Aktualisht në 4 spitalet COVID në Shqipëri po trajtohen 469 pacientë me koronavirus, 31 në terapi intensive, 11 janë të intubuar./ Opinion.al
