Valentina Laho jeton prej vitesh me qira dhe trajtohet me bonus social nga Bashkia e Tiranës, në vlerën e 50 mijë lekëve të vjetra/muaj. Por së fundmi e ka humbur bonusin dhe në Bashki i thonë që nuk i është përgjigjur telefonatës së punonjëses.
Laho tregon se ashtu si 6 vjet më parë, Komisioni i Vlerësimit duhet të shkonte në shtëpinë e saj për të vlerësuar gjendjen. Por një gjë e tillë nuk ka ndodhur. Qytetarja zhvillon një bisedë të regjistruar me drejtoreshën e strehimit në Bashkinë e Tiranës dhe kjo e fundit thotë se parardhësja e saj ka mbajtur për rastin në fjalë procesverbal me 3 firma. E vetmja zgjidhje që sugjeron drejtoresha është gjykata!
“Quhem Valentina Laho, banore e Tiranës. Kam ndenjur në shtëpi private me qira dhe jam trajtuar me bonus social nga bashkia qendrore, me një shumë prej 50 mijë lekësh të vjetra.
Në momentin që unë përfitoj banesë sociale, që nga Janari e deri në Gusht të vitit 2015, mua nuk ma japin bonusin. Unë interesohem dhe më thonë që ne të kemi marrë në telefon dhe ti nuk je përgjigjur. Asnjëherë nuk u ka mjaftuar telefoni, por kanë ardhur me komision dhe kanë verifikuar banojmë këtu apo jo. Kështu që këto nuk kanë bërë punën e tyre.
Unë jam debitore 26 muaj pranë Drejtorisë së Strehimit, sepse më kanë mbajtur 7 muaj nga bonusi dhe nuk m’i kanë kompensuar, që unë të filloj të bëj pagesën normale.
Më kanë njoftuar se, nëqoftëse nuk i paguan dhe këto 7 muaj, atëherë bëhu gati të dalësh nga shtëpia”, thotë ajo për “Stop”.
Denoncuesja iu drejtua Bashkisë së Tiranës për të kërkuar zgjidhje nga Drejtoresha e Strehimit, por përgjigjia që mori nuk i përafrohej aspak zgjidhjes. Drejtoresha i thotë hidh në gjyq ish-punonjësen e Bashkisë ti japë ajo lekët nga xhepi…
