Kreu i Partisë Demokratike, Lulzim Basha, në vijim të fushatës elektorale për zgjedhjet e 25 prillit, ka vizituar këtë të mërkurë një familje të zhgënjyer nga qeverisja e Partisë Socialiste në Durrës.
Gjatë bisedës kryefamiljari i tha Bashës se ka vite që ka qenë pjesë e PS, por është zhgënjyer për legalizimin e shtëpisë. “Ka vite që jam socialist si votues dhe anëtar. Kam kontribuuar jashtë mase. U zhgënjeva jashtë mase për legalizimin e shtëpisë,” tha ai.
Sakaq, Basha i premtoi se PD vjen në këto zgjedhje me një plan punë të hartuar prej dy vitesh me ekspertët më të mirë dhe jo me premtime boshe duke i kërkuar të votojë për ndryshimin.
“Problemi i legalizimeve, unë e kam kërkuar prej 2013 ndjesën, do e përsëris prapë sot. Problemin e legalizimeve duhet ta kishim mbyllur ne, nuk e mbyllëm. Ky erdhi me premtim për legalizime falas, kjo historia jote është ndër mijëra histori në Durrës dhe në gjithë Shqipërinë. Njësoj si me premtimet e tjera nuk e mbajti dhe për legalizimet. Më 25 prill është dita juaj. Ne kemi ardhur para shqiptarëve me plan pune jo premtime boshe. Tullumbacet elektorale e treguan se ku e çuan vendin. Besnikerinë e ke në radhe të parë ndaj familjes pastaj ndaj Shqipërisë. Edhe po të jesh anëtar i PS dhe po të vendosësh të vazhdosh me PS, një gjë të them duke votuar për ndryshimin më 25 prill i ke shërbyer familjes tënde, i ke shërbyer Shqipërisë. Angazhimet që kemi, zotimet që kemi dhe të gjitha ato që i kemi shpallur janë pjesë e një plani, nuk janë bërë dy muaj para fushate. Kemi dy vite që punojmë për çështjen e pronave, legalizimet për t’i dhënë zgjidhje kësaj plage. Ne kemi në dorë të hatojmëe zbatojmë planin, ju e keni në dorë ndryshimin me votë. Më bëhet shumë qefi që socialistët e niveleve të larta kanë thënë do votojnë PD. Do të takohemi prapë dhe pas 4 vitesh nëse këto premtime nuk janë realitet, nuk vij ta kërkoj më votën. Nuk tradhtoni askënd por i shërbeni vetes tuaj, familjes suaj Shqipërisë”, deklaroi Basha./Opinion.al
