Lulzim Basha dhe Edi Rama kanë rënë dakord në mesnatë për të çuar vendin në zgjedhje me të gjitha partitë. Marrëveshja u arrit pas një takimi që ata patën kokë më kokë në kryesinë e Kuvendit që përfundoi në 01:30 të ditës së sotme.
Basha tha se kemi rënë dakord mbi marrëveshjen “McAllister +” por nuk dha detaje, ndërsa Rama u shpreh se mbështes atë që tha Basha.
Sakaq lideri i opozitës është larguar në këmbë drejt çadrës ku u ka komunikuar mbështetësve të tij vendimin. “U arrit e pa besueshmja- tha ai- duke shtuar se çadra mbyllet dhe shkojmë drejt zgjedhjeve.
“Gjithçka ka ndryshuar. E pabesueshmja e 3 muajve më parë është realitet. Sot nisim përgatitjet për tu dhënë shqiptarëve zgjedhje të lira. Asgjë s’do jetë si më parë, falë vullnetit tuaj”, tha Basha para mbështetësve. Çadra do të mbyllet sapo të përpilohet dhe nënshkruhet marrëveshja e dakordësuar, sqaroi ai.
Ende nuk dihet se në çfarë date janë caktuar zgjedhjet. Detajet do ti mësojmë gjatë ditës së sotme. /Opinion. al
