Kreu i OSHEE në Vlorë, Roland Saliu dhe biznesmeni Erven Hyseni janë vrarë me kallashnikov në kohën kur ndodheshin në lokalin e këtij të fundit, në “Sheshin e Flamurit” mbrëmjen e djeshme.
Policia gjeti pak minuta më vonë makinën e braktisur të të dy autorëve. Dyshohet se shënjestra e atentatit ka qenë biznesmeni Hyseni.
Drejtori i OSHEE në Vlorë, Roland Saliu dhe nje biznesmen nga Vlora ishin ulur në tavolina ngjitur në lokalin që u sulmua me kallashnikov. Ngjarja tronditi qytetarët që ndodheshin të “Sheshi i Flamurit”.
Autorët që lëviznin me një automjet mendohet se ishin dy persona të maskuar. Nga të shtënat me armë gjeti vdekjen në vend funksionari i lartë Roland Saliu.
Disa nga familjarët e tij ndodheshin në lokal… Janë momente tragjike ato të përballjes së familjareve me skenën e rëndë, siç shihet edhe në pamjet e AbcNews.
Pronar i lokalit, i cili dyshohet se ishte shënjestra e atentatorëve humbi jetën disa minuta pas ngjarjes në spitalin rajonal të Vlorës.
Vrasësit u larguan nga vendngjarja dhe në fshatin Panaja braktisën mjetin e tyre. Policia e gjeti të djegur makinen tip BMW me targa AA 348 PO.
Menjëherë u sekuestruan pamjet e kamerave të sigurisë të biznesve pranë vendit ku ndodhi krimi me synimin për të identifikuar autorët.
Policia shoqëroi në komisariat disa klientë dhe personelin e lokalit për ti marrë në pyetje si dëshmitarë të ngjarjes.
Policia po heton për të kaluarën e Erven Hysenit i cili dyshohet si objektiv i atentatit. Ai ka në pronësi të tij një televizion lokal, një hotel dhe lokalin ku humbi jetën.
Para vitit 2000, Hyseni ka jetuar në emigracion. Bizsnesmeni nga Vlora mësohet se është i afërm i një prej viktimave të masakrës së Çoles, ngjarje e ndodhur në 7 prill 2015. Një pistë tjetër që po hetohet është edhe ajo e hakmarrjes, ndërsa ende nuk ka asnjë gjurmë të autorëve të atentatit.
.
