Një shqiptar është qëlluar me armë zjarri mbrëmjen e së dielës në Belgjikë. Mediat vendase bëjnë me dije se atentati ka ndodhur në lokalin e një tjetër shqiptari në Schaerbeek të Brukselit.
Sipas informacioneve, shqiptari 44-vjeçar është qëlluar 4 herë me pistoletë, duke marrë dy plumba në kokë dhe dy në trup. Aktualisht ai ndodhet në spital në gjendje kome.
Siç shihet dhe në video, autori i cili ka mbuluar fytyrën ecën në trotuar pranë tavolinës ku ishte ulur 44-vjeçari së bashku me një person tjetër dhe papritur nxjerr pistoletën nga xhepi dhe hapi zjarr ndaj tij.
Pasi qëllon 44-vjeçarin, autori largohet me shpejtësi nga vendi i ngjarjes. Autoritetet dyshojnë se dhe autori i ngjarjes është shtetas shqiptar.
Autoritetet belge janë në komunikim me Policinë Shqiptare për këtë rast dhe i kanë informuar për identitetin e të plagosurit. Dyshohet se ngjarja ka ndodhur për larje hesapesh, megjithatë do të priten hetimet e agjentëve të policisë.
