Pas transmetimit në “STOP” të skandalit me çertifikatat e njohjes së anglishtes, policia ka vënë në pranga pedagogun Ukë Buçpapaj. Ndërsa në kërkim është shpallur sekretarja 27-vjeçarje me iniciale E.M.
Sipas policisë ndalimi i 58-vjeçarit Buçpapaj, me detyrë kryetar i shoqatës “Ader” dhe nisja e procedimit në ngarkim të E. M., u bë sepse gjatë ushtrimit të detyrës tek kjo shoqatë, dyshohen se në bashkëpunim me njëri-tjetrin, kanë falsifikuar një numër të konsiderueshëm çertifikatash të gjuhës angleze, të cilët ua kanë shitur studentëve të Fakultetit të Shkencave Teknike Mjekësore, kundrejt shumës 150 euro/çertifikatë.
Policia sekuestroi gjithashtu 72 çertifikata të lëshuara nga kjo shoqatë.
Dy ditë më parë emisioni ‘’Stop’’, në Tv Klan, transmetoi skandalin se si mund të marrësh testin e anglishtes që nevojitet për master.
Mjafton të paguash 150 euro dhe pa shkuar fare në provim, këtë diplomë e ke në dorë. Nëpërmjet një kamere të fshehtë, u tregua mënyra e marrjes së këtij testi ndërkombëtar të anglisht. Certifikata e njohjes së anglishtes ishte e firmosur nga profesori, Ukë Zenel Buçpapaj.
