Pavarësisht ndryshimeve në Kodin Penal, dhuna në fushat e sportit vazhdon të jetë prezente në Shqipëri. Kjo video është dërguar në redaksinë e Opinion, teksa tregon dhunën e ushtruar ndaj arbitrit të ndeshjes Kastrioti-Egnatia. Kjo sfidë është zhvilluar ditën e diel, java e parë e Kategorisë së Parë.
Sipas denoncimit, personi që ushtron dhunë ndaj arbitrit Endrit Zhuli, është administratori i ekipit të futbollit të Kastriotit, Gazmend Vogli.
Por ajo që e bën edhe më skandaloze këtë ngjarje është fakti që, siç dallohet dhe në video, prezent në momentin kur ushtrohet dhuna janë dhe dy efektivë të policisë së rendit, të cilët nuk bëjnë asnjë lëvizje.
Opinion pyeti zyrtarisht Drejtorinë e Policisë në Durrës për rastin konkret dhe si përgjigje na u tha se nuk ka asnjë denoncim. Natyrshëm lind pyetja, si mund të mos ketë denoncim për rastin, ku siç tregohet qartë dy efektivë të policisë janë pothuajse ngjitur me dhunuesin?/ Opinion.al
