Kompania Apple ka njoftuar se “Apple Park”, kampusi i ri i kompanisë, kostoja e të cilit pritet të arrijë në rreth 5 miliardë dollarë, do të jetë gati për punonjësit e saj që nga fillimi i muajit prill.
Siç shkruajnë mediat e huaja, gjithsesi procesi i transferimit të më shumë se 12.000 njerëzve do të marrë më shumë se gjashtë muaj kohë, dhe ndërtimi i ndërtesave dhe parqeve është planifikuar të vazhdojë edhe gjatë verës.
E parashikuar nga Steve Jobs, si një qendër për kreativitet dhe bashkëpunim, Apple Park ka transformuar milje hapësira të asfaltit në një strehë të hapësirës së gjelbër në zemër të Santa Clara Valley, Kalifornia Veriore.
Kampusi i cili thuhet se do të ketë formën e një “anije kozmike”, me rreth 2,8 milionë metra katrorë është i veshur tërësisht me panele të mëdha prej qelqi të lakuar.
Tanimë i ndjeri Steve Jobs do të kishte festuar 62 vjetorin këtë të premte, më 24 shkurt. Dhe për të nderuar kujtimin e tij dhe ndikimin e tij në Apple dhe në botë, teatri në Apple Park do të quhet “Teatri Steve Jobs”.
Teatri që pritet të hapet në fund të këtij viti, do të ketë një hapësirë me rreth njëmijë ulëse. Ai është i vendosur në një nga pikat më të larta të Apple Park, me një pamje mbresëlënëse.
Apple Park do të përfshijë ndër tjerash edhe një qendër për vizitorët me një Apple Store dhe kafene të hapura për publikun, palestra për punonjësit e Apple, si dhe hapësirat e kërkimit dhe zhvillimit.
E dizajnuar në bashkëpunim me Foster+Partners, Apple Park do të furnizohet me energji 100 për qind nga energjia e rinovueshme.
Me 17 megavat panele solare, Apple Park do të ketë në dispozicion instalimin më të madh të energjisë solare në botë.
Ajo është gjithashtu vendi më i madh me ventilim natyral, i projektuar për të mos pasur nevojë për ngrohje apo ajër të kondicionuar për nëntë muajt e vitit.
