Ndeshjet e të shtunës në javën e parë të kampionatit anglez janë mbyllur me një fitore të vuajtur të Mançester Sitit të Pep Guardiolës, i cili u desh të djersinte shumë ndaj Sandërlendit që drejtohet nga David Mojes.
Guardiola kishte bërë ndryshime të mëdha në radhët e skuadrës së tij, duke lënë jashtë portierin Hart dhe mesfushorin Jaja Ture për këtë sfidë të parë të kampionatit. Zgjedhjet e tij dukej se ishin të goditura pasi skuadrës iu deshën vetëm pak minuta për të kaluar në avantazh me anë të Agueros, pas një penalltie të shkaktuar nga Van Anholt.
Siti vazhdoi të sulmonte dhe dukej në kontroll të plotë të ndeshjes, duke krijuar disa raste të tjera për shënim, por Manone ishte gjithmonë i vëmendshëm.
Ndërkaq, Mojes vendosi të hidhte në fushë Adnan Januzajn i cili kishte vetëm një ditë që i ishte bashkuar skuadrës së tij të re, i dhënë në huazim nga Mançester Junajtid.
Vetëm 5 minuta pasi hyri në fushën e lojës, 21 vjeçari u bë protagonist duke marrë pjesë në aksionin që solli golin e barazimit 1-1, të realizuar nga Defo.
Por zëvendësimi i radhës i Mojes, i cili largoi pikërisht autorin e golit për të aktivizuar MekNeir, rezultoi fatal. Në minutën e 87 të ndeshjes, ishte pikërisht i sapofuturi në lojë që devijoi në portën e tij një harkim në zonë nga Hesus Navas, që mjaftoi për t’i dhënë suksesin 2-1 skuadrës së drejtuar nga Pep Guardiola.
http://www.dailymotion.com/video/x4m4njg_sport
http://www.dailymotion.com/video/x4onjle_sport
http://www.dailymotion.com/video/x4on4zw_sport
