Rreth 150 kubikë kanabis sativa, që duken në këtë foto të siguruar nga Televizoni Klan, janë gjetur nga Policia e Tiranës pasditen e djeshme, në shtëpinë e vëllezërve Kallari, pak minuta pas ngjarjes së rëndë.
Pronësia mbi tokën dhe mosmarrëveshjet për mbjelljen e lëndës narkotike, mbrapa shtëpisë së përbashkët, janë shkaqet e konfliktit që çoi në vrasjen e Elmir Kallarit, nga vëllai i tij, Afrimi.
Pas dorëzimit në polici, Afrim Kallari, me detyrë Inspektor i Zjarrëfikëses në Kombinat, është shfaqur i penduar dhe ka deklaruar se ngjarjen e ka kryer në gjaknxehtësi e sipër, pas një inati të akumuluar me vëllain prej disa kohësh.
43 – vjeçari Kallari e qëlloi me armë gjahu vëllain. Nga të shtënat mbeti e plagosur edhe nëna e tyre, e cila po i ndante.
Ngjarja e rëndë ndodhi në brendësi të godinave të Ekonomisë Didaktike të Universitetit Bujqësor të Kamzës, ku 36 – vjeçari Elmir Kallari punonte si roje.
