“Tiki-taka” në Angli? Pse jo? Gjithçka mund të ndodhë edhe atje ku thuhet se loja është konservatore, sidomos tani që Pep Guardiola ka zbarkuar në ishull. Lojtarët e Blackburn Rovers-it kanë realizuar një gol spektakolar pikërisht me këtë mënyrë kundër Derby County-t, ndonëse është disi relative të përcaktosh a është me stil katalanas. Pas 25 pasimesh të shpejta e një aksioni fantastik me mbajtje topi, Danny Graham mori një top në hyrje të zonës, që kishte kaluar në këmbët e të gjithë ofensivës së ekipit nga e djathta në të majtë dhe sërish në të djathtë dhe pastaj shënoi me lehtësi.
Blackburn Rovers prej vitesh luan në Championship në Angli (kategoria e dytë), por ky gol me siguri që u ka dhënë një sinjal të mirë tifozëve dhe sponsorëve, që kjo skuadër ka brum dhe mund të dhurojë futboll spektakolar, edhe pse gjendet në vendin e 23-të në tabelën e klasifikimit. Shijojeni edhe një herë klasin e lojtarëve të teknikut Owen Coyle në sfidën e javës së nëntë!
