Gjykata Kushtetuese shtyu për më 28 shtator shqyrtimin e padisë së shoqatave të gjyqtarëve për shfuqizimin e disa neneve në 3 prej ligjeve më të rëndësishme të Reformës në Drejtësi, një prej tyre është Vetingu.
Gjykata kishte vendosur shqyrtimin e çështjes mbi bazë dokumentash, por pasi u mblodh vendosi që këtë ta bënte në një seancë të hapur në fund të shtatorit. Ndër të tjera Unioni dhe Shoqata e gjyqtarëve kundërshtojnë pozicionin e tyre në Këshillin e Lartë Gjyqësor në raport me anëtarët jogjyqtarë, apo procedimin disiplinor sipas tyre në kapërcim të Kushtetëtes.
Tek Vetingu shohin si mundësi abuzimi parashikimin ligjor për raportin e gjyqtarëve apo të personave të lidhur me krimin e organizuar. Kërkojnë edhe që pushimi i rivlerësimit të bëhet në çdo moment që gjyqtari dorëhiqet jo vetëm nëse dorëheqja bëhet brenda tre muajve të parë. Sipas Kuvendit kërkesa nuk duhej të ishte pranuar, ndërkohë që një pjesë e çështjeve të pretenduara janë rrëzuar nga Gjykata Kushtetuese. /ABC
