Kreu i Grupit Parlamentar të Partisë Socialiste, Taulant Balla ka dhënë sot një deklaratë për mediat ku ka folur për takimin me reporteren për Shqipërinë në Parlamentin Europian Isabel Santos.
Balla, u shpreh se në takim u theksua domosdoshmëria për arritjen e dakordësisë së të gjitha palëve për zgjatjen e organeve të vetingut.
“Progres raporti i këtij viti më i miri për Shqipërinë, i ka hapur dritën jeshile për mbajtjen e konferencës së parë ndërqeveritare. Edhe pse kjo është ndërlidhur me zgjedhjen e mosmarrëveshjes Bullgari-Maqedoni. E rëndësishme për ne është se do vazhdojmë të intensifikojmë përpjekjet për të çuar para reformat. Theksuam nevojën e dakordësisë së të gjitha palëve për zgjatjen e organeve të vetingut. Nuk duhet të jetë kurrësesi në çështje politike. Jemi në kushtet e një nevoje emergjente që palët të bien dakord.” u shpreh Balla.
Balla iu përgjigj gazetarëve ndërsa u pyet për absetinimin që deputeti Fatmir Xhafaj bëri në Këshillin e Legjislacionit ku maxhoranca votoi propozimin për t’iu drejtuar për opinion Komisionit të Venecias, lidhur me zgjatjen e afateve të institucioneve të vetingut.
“Nuk ka mungesë dakordësie, Xhafaj është një ndër ata njerëz që ka dhënë kontribut në reformën në drejtësi. Kemi patur diskutim edhe së bashku si kryetar grupi. Ai mendon se Venecia e ka patur një opinion për këtë. Ka patur sensibilitet edhe nga opozita dhe ekspertë të tjerë, ndaj kemi kërkuar një opionin të ri.” u shpreh Balla.
