Pas gjyqtarit Admir Thanza radha në veting i erdhi Kosta Belurit. Ai doli para së njëjtës trupë gjykuese të KPK-së të përbërë nga Olsi Komici, Lulzim Hamitaj dhe Brunilda Bekteshi.
Beluri është prokuror i Prokurorisë së Përgjithshme dhe kandidat për Këshillin e Lartë të Prokurorisë.
Sipas raportit të ILDKPIK-së, prokurori Beluri ka bërë deklarime të sakta të pasurisë.Ai ka në pronësi një apartament në Tiranë, me sipërfaqe 60 m2, një depozitë bankare 850 mijë lekë nga kursimet dhe 720 mijë lekë në llogari rrjedhëse.
Nga hetimi i thelluar rezulton se pasuritë e tij janë të justifikuara. Edhe nga raporti i Drejtorisë së Sigurimit të Informacionit të Klasifikuar, ai rezulton i përshtatshëm për vazhdimin e detyrës. Gjithashtu pozitiv është raporti i Prokurorisë së Përgjithshme për aftësitë profesionale.
Por sipas Komisionit të Pavarur të Kualifikimit, Beluri është prokurori që ka pushuar hetimin për “korrupsion” të nisur ndaj Admir Thanzës. KPK bëri të ditur se Beluri nuk ka kryer hetim të plotë dhe të thelluar.
Në seancë është shfaqur një foto e gjyqtarit Thanza me motrën e një personazhi të njohur në Shkodër (zyrtari i hipotekës). Sipas përgjimeve të forcës operacioniale, në një moment gjatë takimit, shihet teksa këmbejnë një pako me gruan në fjalë, pra e merr pakon nga njëra qese e kalon në tjetrën. Pikërisht për këtë çështje iu kerkuar sot llogari ne veting prokurorit Beluri.
