Drejtuesja e Prokurorisë së Krimeve të Rënda, Donika Prela ka dalë sot para trupës së Vettingut. Komisioni i Pavarur i Kualifikimit ka konstatuar se ka probleme me deklarimin e pasurisë.
Komisioni gjeti shkelje në blerjen e një apartamenti të Prelës dhe të një sipërfaqe toke. Drejtuesja e Krimeve të Rënda deklaroi se ka blerë një apartament në vitin 2007, 95.6m2 me vlerë 32.100 euro. KPK theksoi se kishte një mospërputhje mes çmimit të tregut dhe atij që ishte blerë, por Prela reagoi duke sqaruar se apartamenti ishte blerë me lirë për faktin se burri i saj punonte inxhinier në firmën që e ndërtoi. Këtë apartament Prela e shiti disa vite më pas për 80 mijë euro, ndërsa bleu një tjetër 135.9 m2, 110 mijë euro në vitin 2018.
Përsa i përket tokës arë, Prela zotëron një sipërfaqe 1000m në Petrelë me çmim 350 mijë lekë. Edhe këtu KPK ngriti pikëpyetje, pasi çmimi është më i ulët se vlera e tregut, por Prela u shpreh se çmimi aq ka qenë asokohe kur është blerë.
Një tjetër pikë që solli replika në seancë me Prelës dhe përfaqësuesit të ONM-së ishte paga e burrit të prokurores, që nga 2003 deri në 2011 është marrë cash dhe jo në bankë edhe pse Vangjel Preka kishte llogari.
Përfaqësuesi i Operacionit Ndërkombëtar të Monitorimit, Teo Jacobs u shpreh se me këtë veprim janë shmangur tatimet dhe se i lë një shije të hidhur. Madje ai ngriti dyshimin se mund të ketë pasur bashkëpunim për të shmangur taksat. Por Prela tha se detyrimi i takon kompanisë të paguajë detyrimet në shtet, por në momentin që u informua për këtë gjë bëri padi civile duke kërkuar kthimin.
Debati
Teo Jacobs: Më trego që ai është viktimë dhe jo shmangie nga taksat’. Përse burri juaj është paguar në cash kur ai ka pasur një llogari bankare? Jam i sigurt që ju keni provuar që të pini ilaçe në mëngjes dhe ato ilaçe të lënë një shije të keqe dhe nuk mund ta pish mire kafen. Dhe pas drekës shija përmirësohet. Kam lexuar dosjen tuaj dhe ne akoma nuk kemi arritur në kohën e drekës për të shmangur dyshimet për të larguar shijen e keqe në gojën time. Pse bashkëshorti juaj e ka marrë pagën në të holla dhe ai ka pasur llogari bankare? Kjo mund të duket pyetje pa vend por ju e dini në diskutimet tona dhe se nuk janë paguar taksat me koicidencë ose jo. Kjo më le shije të keqe. Unë fokusohem tek taksat. Më ndihmo të kuptoj që nuk është rastësi.
Donika Prela: Unë dhe bashkëshorti kemi jetuar në Shqipëri dhe jo në një vend të BE-së. Ju kuptoj pse jeni i paqartë. Bashkëshorti im është i saktë në orientimin e tij në shkencat ekzakte. Përsa i përket marrëdhënie së punës ka bërë kontrata të rregullta me pagë neto e detyrime. Ai i është përmbajtur kontratave dhe firma e ndërtimit që nuk ka respektuar detyrimet ligjore. Nuk është rast i vetëm. Mos respektimin e kontratave e bëjnë dhe institucione shtetërore. Për tatimet nuk detyrojmë punëmarrësit të paguajë tatimet. Mbahen në burim nga punëdhënësi e paguhen prej tij. zoti Teo të dëmtuar jemi ne. Por nuk kemi pasur qëllim të bëjmë pasuri të paligjshme”.
Burimi: Shqiptarja.com
