Gjykata në Shkodër dënoi me gjashtë vite burg Erdgys Arrazin, bashkëshortin e Alma Arrazit, e cila më 3 Maj të vitit 2024, u vetëvra bashkë me 3 fëmijët e saj.
Për shkak të gjykimit të shkurtuar, atij i ulet me dy vite dënimi dhe përfundimisht do të vuajë katër vjet heqje lirie.
Sipas tvklan, gjyqtari Orgent Nazaj e deklaroi fajtor Arrazin për akuzën e “shkaktimit të vetëvrasjes”.
Të njëjtën masë dënimi e kishte kërkuar edhe prokuroria. Ajo e akuzoi Arrazin se e ka shtyrë bashkëshorten e tij drejt aktit të vetëflijimit për shkak të sjelljes diskretituese, duke cenuar dinjitetin e saj.
Sa i takon çështjes së tre fëmijëve për shkak se autorja e dyshuar e krimit, Alma Arrazi ka vdekur, është pushuar si çështje.
Kujtojmë që Alma Arrazi në datën 3 Maj, pas një takimi që zhvilloi me motrën e burrit në një kafe në Shkodër, me tre fëmijët e saj shkoi drejt urës së Bunës nga ku u vetëhodh.
Fillimisht u gjet trupi i pajetë i një prej fëmijëve dhe më pas kërkimet nxorën edhe nënën me dy të miturit e tjerë.
