Lëvizja Vetëvendosje, tha të dielën se Kosova nuk po sillet si shtet karshi marrëveshjes me Serbinë të arritur në Shtëpinë e Bardhë.
Drejtues të partisë më të madhe opozitare në Kosovë, theksojn[ se ‘marrëveshja për stabilizim ekonomik mes Kosovës dhe Serbisë, është negociuar në kurriz të Kosovës’.
Në një konferencë për media, anëtari i kësaj partie, Avni Zogiani, ka thënë se me pikën për autostradën, hekurudhën dhe linjën ajrore që lidhë Kosovën dhe Serbinë si dhe pikat e tjera, Kosova po vazhdon të “sillet si autoritet joshtetëror”.
Sipas tij, marrëveshjet infrastrukturore vetëm e kanë forcuar Serbinë.
“Kur flitet për hekurudha, autostrada, në këto marrëveshje nuk gjenden referenca për pikat kalimtare si pika kufitare. Vazhdojmë të pranojmë një proces që thellon sjelljen e Kosovës si autoritet joshtetëror. Marrëveshjet infrastrukturore forcojnë jashtëzakonisht rolin e Serbisë në rrjetin ndërkombëtar të transportit. Serbia do jetë vendi ku do kalojnë dy korridore”, ka thënë Zogiani.
“Qeveria Hoti këto projekte i ka reduktuar në marrëdhëniet mes Kosovës dhe Serbisë, do të thotë se zhvillimi i Kosovës detyrohet nëpërmjet Serbisë. Gjithçka për zhvillimet infrastrukturore shihet përmes prizmit të Serbisë”, ka shtuar ai.
Marrëveshja e 4 shtatorit në Uashington, për siç është thënë, normalizimin ekonomik ndërmjet Kosovës dhe Serbisë, parasheh zbatimin e një sërë marrëveshjesh të arritura tashmë, siç është ajo për autostradën mes Kosovës dhe Serbisë, ajo për hekurudhat dhe për linjën ajrore.
Në praninë e presidentit të Shteteve të Bashkuara të Amerikës, Donald Trump, kryeministri i Kosovës, Avdullah Hoti dhe presidenti i Serbisë, Aleksandar Vuçiq, kanë nënshkruar, veç e veç, dokumente për normalizim ekonomik prej 16 pikash, të cilat janë konsideruar si marrëveshje apo zotime të njëanshme./ REL
