Sekretari i Përgjigjëm i Partisë Demokratike, Gazment Bardhi ka rikthyer sërish vëmendjen në çështjen e kryebashkiakëve socialistë të cilët PD i ka denoncuar si të dënuar.
Deri tani, nga denoncimet e Partisë Demokratike janë shkarkuar dy kryebashkiakë, Valdrin Pjetri i Shkodrës dhe Agim Kajmaku i Vorës i cili është edhe në kërkim. Ata kanë rezultuar se kanë bërë deklarim të rremë në formularin e dekriminalizimit.
PD ka denoncuar gjithashtu kreun e Bashkisë së Vaut të Dejës, Mark Babani, Qerim Ismailajn e Mallakastrës dhe Agron Malajn e Bashkisë Mat si ish të dënuar. Për ta, janë paraqitur prova nga gjykatat e vendeve fqinje të cilat pritet të administrohen nga prokuroria.
Megjithatë, Gazment Bardhi në një postim në Facebook, nënvizon se kjo është vetëm maja e ajsbergut “të lidhjeve të Edi Ramës me botën e errët të krimit”. Ai bën përgjegjës drejtpërdrejtë kryeministrin për emërimin e këtyre personave në krye të bashkive dhe kërkon largimin e tij si zgjidhja e vetme e ndarjes së politikës nga krimi.
“Edi Rama është përgjegjës kryesor për përfshirjen e krimit në politikë. 5 kryebashkiakët e rinj ilegjitimë, trafikantë droge, hajdutë, falsifikatorë, dhunues apo vrasës janë vetëm maja e ajsbergut të lidhjeve të Edi Ramës me botën e errët të krimit, tek e cila bazoi karrierën politike dhe po mban pushtetin.
Ndarja e politikës nga krimi nis me largimin e Edi Ramës”, shkruan Bardhi. /Opinion.al
