Ministrja e Shëndetësisë, Ogerta Manastirliu, ka bërë me dije ditën e sotme se do të ulet fasha e vaksinimit për qytetarët +50 vjeç .
Lajmin Manastirliu e ka dhënë nga qendra e vaksinimit në sheshin “Skënderbej”, ku ka nisur procesi i vaksinimit për këtë fashë.
“Hapim fashën 50-59 vjeç, duke filluar nga grupmosha më e lartë dhe më pas në rend zbritës, për të mundësuar që të gjithë ata që janë më të riskuar, të vaksinohen sa më herët. Ky është një organizim i cili është duke u bërë nga mjeku i familjes. Por të gjithë ato qytetarë që i përkasin kësaj fashe grupmoshe mundet edhe të aplikojnë pranë portalit e-Albania, për të rezervuar ditën e vaksinimit të tyre. Në çdo rast, mjeku i familjes do t’i njoftojë qytetarët për vendin dhe orën e vaksinimit”, ka bërë me dije Manastirliu.
Ndër të tjera Ministrja Manastirliu bëri me dije se sot priten sërish vaksina të tjera Pfizer.
“Bashkë me 100 mijë vaksinat Coronavac që mbërritën këto ditë, deri tani janë mbi 1 milion e 60 mijë vaksina të mbërritura në vend, ndërsa sot presim sërish mbi 11 mijë vaksina Pfizer”, tha Manastirliu.
Gjithashtu gjatë fjalës së saj Manastirliu ka treguar se në spitalin Infektiv janë vetëm 3 pacientë të shtruar, që marrin shërbim, teksa sipas saj përpos shifrave të infektimeve dhe vdekjeve të ulëta vigjilenca nuk duhet ulur.
“Është e vërtetë që jemi në një situatë të kontrolluar të epidemisë. Në spitalin Infektiv janë vetëm 3 pacientë të shtruar, që marrin shërbim. Pra siç tregojnë shifrat dhe siç analizojnë ekspertët tanë të shëndetit publik, situata është shumë e kontrolluar, por duhet të vijojmë të jemi vigjilentë. Ndaj duhe të përfitojmë nga kjo situatë e kontrolluar, për të bërë vaksinat”, tha Manastirliu./Opinion.al
