Kryetari i Kuvendit të Kosovës, Kadri Veseli ka reaguar për thirrjen që gjykata speciale ka bërë sot për Jakup Krasniqin.
Me anë të një statusi në Facebook, Veseli e ka cilësuar “një goditje” ndaj UÇK-së dhe luftës së saj thirrjen e gjykatës. Ai shkruan se lufta e popullit shqiptar për trojet e veta është një nga kapitujt më të ndritur të historisë.
Pavarësisht kësaj situate, Veseli shprehet i bindur se Jakup Krasniqi, Bislim Zyrapi, Ramush Haradinaj dhe Sokol Bashota do të shpallen të pafajshëm dhe do të kthehen kryelartë në Kosovë.
“Lufta e popullit shqiptar për të jetuar i lirë dhe i pavarur me dinjitet e krenari kombëtare në trojet e veta shekullore të Kosovës, është një ndër kapitujt më të ndritur të historisë sonë bashkohore dhe askush nuk do mund ta njollosi dot. Me keqardhje pranova sot lajmin e thirrjes nga gjykata speciale të ish-Zëdhënësit të Ushtrisë Çlirimtare të Kosovës, z. Jakup Krasniqi menjëherë pasi janë thirrur tashmë ish- shefi i Shtabit të UÇK-së, Bislim Zyrapi, ish- komandanti i Zonës Operative të Dukagjinit, Ramush Haradinaj dhe ish- anëtari i Shtabit të UÇK-së, Sokol Bashota. Kjo është një goditje për bashkëluftëtarët e mi, për UÇK-në dhe luftën tonë, por unë jam i sigurtë që do e kapërcejmë me kurajo dhe nder këtë sfidë së bashku dhe do dalim prej saj më të fortë se më parë. Unë jam i bindur se ata do të kthehen përsëri të pafajshëm e kryelartë sepse e drejta ka qenë dhe mbetet në anën tonë dhe ne kemi qenë në anën e duhur të historisë” shkruan zoti Veseli. /Opinion.al
