PRISHTINE –Kryetari i Kuvendit të Kosovës, Kadri Veseli në një konferencë të jashtëzakonshme për media, pas zhvillimeve të fundit, ka tha se me veprimet e saj opozita është duke dëmtuar kolegët, veten, dhe Republikën e Kosovës.
“Jemi munduar t’i ikim gjuhës së rëndë dhe eskalimit, për hir të interesave të vendit tonë”, u shpreh kryeparlamentari.
“Por kolegët tanë opozitarë në mënyrën më të vrazhdë vepruan në mënyrë joligjore dhe jodemokratike”.
“Ftoj edhe një herë opozitën për dialog brenda institucioneve të Kosovës. Dua të ritheksoj se cdo veprim si këto të sotmet, është sa i dëshëm, aq dëshpërues dhe i papranueshëm për ne”.
“Ne do të punojmë në përmbushjen e agjendës sonë shtetërore”.
Veseli ka thënë se ai është munduar që të ofrojë ambient për debat, por që deputetët e opozitës nuk kanë dashur, ndërsa ai e ka thënë me vendosmëri se si kryetar i Kuvendit të Kosovës, ai “nuk do të lejojë që Kuvendit të jetë vendi ku rrëzohet Qeveria e Kosovës”.
“Ka disa muaj që jemi bashkërisht në secilën gjë që po ndodhë në vend. Nëse ka vetëm një moment, një sekond, që unë si kryetar i Kuvendit të Kosovës ia kam ndaluar shprehjen, fjalën e lirë, apo e kam cenuar qëndrimin e tyre brenda Kuvendit të Kosovës, jam i gatshëm të jap dorëheqje”.
“Nuk është zgjidhja më e mirë imponimi me forcë i qëndrimit të dikujt. Unë shpreh vendosmërinë se Kuvendi i Kosovës nuk do të jetë vendi ku rrëzohet Qeveria e Kosovës”.
“Seancat e Kuvendit të Kosovës do të mbahen derisa deputetët e koalicionit qeveritar të kenë vullnet për t’i mbajtur ato. Ne nuk po e dimë saktë cili është qëndrimi i opozitës së pari për Republikën e Kosovës. A e njohin ata Republikën e Kosovës? A e njohin ata flamurin e Republikës së Kosovës? A është thirrja për zgjedhje tendencë për të delegjitimuar një shumicë dhe me kë do të futeshim pastaj në koalicion? Me Kinën? Me Rusinë?”
“Unë i ftoj deputetët e opozitës që të vijnë në seancat e radhës. Edhe sot, dhjetëra bombola gazi lotsjellës janë hedhur mbi ne, mbi kokat tona”.
“Sa i përket çështjes se a është thyer Rregullorja apo Kushtetuta, opozita ka mundësi që ta dërgojë këtë gjë në Gjykatën Kushtetuese”.
“Për dallim nga herët e kaluara, këtë radhë kemi vendosur ventilatorë, për ç’gjë e falënderoj Administratën e Kuvendit”.
“Procesi i zgjedhjes së presidentit të Kosovës do të jetë proces transparent. Do të jetë demokratik, i bazuar mbi shtetin ligjor – Kushtetutën”.
“Sot duhet të frikësohemi nëse po e dëmtojmë vendin tonë, partneritetin me bashkësinë ndërkombëtare. Pa këtë partneritet nuk mund të ecim përpara”.
“Unë nuk jam ai që i kontrolloj deputetët”, tha Veseli.
